هێرشی هێزە ئینتیزامییەکانی تیکاب بۆ سەر خەڵکی گوندی ئاق‌دەرە بووە هۆی برینداربوون و دەسبەسەرکرانی چەند کەسی خەڵکی ئەو ئاواییە.
ئێوارەی ڕۆژی پێنجشەممە، 25ی جۆزەردان هێزە ئینتیزامییەکانی شاری تیکاب هەڵیان کوتایە سەر گوندی ئاق‌دەرە و بەربوونە گیانی خەڵک. لەو پەلامارەدا دەیان کەس لە خەڵکی ئاوایی کە چەند کەسیان ژن بوون، بە توندی بریندار بوون و چەند کەسێکیش دەسبەسەر کران.
ئەو پەلامارە دوای ئەوە کرایە سەر ئەو خەڵکە کە ماوەی نیزیک بە مانگێک بوو هەندێک کەسێ خەڵکی گوندەکانی ئاغدەرەی سەروو، ئاغدەرەی خواروو و ئاغدەرەی نێوەڕاست کە لە نیزیک کانگای زێری ئاغدەرەی تیکاب هەڵکەوتوون؛ بە نیشانەی ناڕەزایەتی بە بێکاریی زۆری خەڵکەکە و دامەزراندنی کۆمەڵە کەسێکی کەم لە خەڵکی ئەو ئاواییانە مانیان گرتبوو.
خەڵکانی ناڕازی و مانگرتوو دەڵێن ئەو کانگایە لە تەنیشت گوند و مەزرا و مووچەکانی ئیمەیە، بەڵام نیزیک بە تەواوی کرێکار و کارمەندەکانی غەیرە کورد و خەڵکی شارەکانی دیکەی دەرەوەی کوردستانن و بەشی ئەوان تەنیا کارکردنی چەند کەسێکی خەڵکی ئاواییە لەو کارخانەیە ئەویش بە گرێبەستی چەند مانگە.
خەڵکی ئاواییەکانی ئاغدەرە دەڵێن ناڕەزایەتیی ئێمە هیچ توندوتیژییەکی لە پشت نییە و داواکانمان ڕەوان، کەچی چەند کەسمان بانگ کراونەتە ئیتلاعاتی سپاس و هەڕەشەیان لێکراوە و پێیان گوتوین ئەگەر لە مانگرتنەکەمان بەردەوام بین تاوانی هەوڵدان دژی ئەمنیەتی وڵاتمان دەدرێتە پاڵ.
بەپێی ڕاپۆرتی هەواڵدەریی موکریان هێزە ئینتیزامییەکان لەگەڵ پەلاماردنی خەڵکی ئەو ئاواییانە توندوتیژیی زۆریان کردوە و ژنان ویستوویانە پێشیان پێبگرن، بەڵام ئەوانیش کەوتوونەتە بەر لێدان و کوتانی هێزە چەکدارەکان و دوایەش چەند کەسیان لێ دەسبەسەر کراوە.
ساڵی ڕابردووش 17 کەس لە کرێکارانی کوردی کانگای زێڕی ئاغدەرە کە خەڵکی گوندەکانی ئاغدەرە بوون، بەهۆی مانگرتن و ناڕەزایەتیدەربڕین سزای زیندان، جەریمەی نەغدی و لێدانی قامچی‌یان بەسەردا سەپا کە جیا لە سزای زیندانەکە ئەوانی دیکەیان لەسەر جێبەجێ کرا.
