چاونیوز: کۆڵبەرێک لە سنووری سەردەشت بە تەقەی ڕاستەوخۆی هێزە نیزامییەکانی ئێران دەکوژرێ و کۆڵبەرێکی دیکەش لە شاهۆ بریندار دەکرێ.
بە پێێ هەواڵی گەیشتوو بە چاونیوز، سەرلەبەیانی ئەمڕۆ چوارشەممە ١٢ی خەرمانانی ١٣٩٩، لە سنووری قەلەڕەشەی سەردەشت هێزەکانی ڕێژیمی کۆماری ئیسلامی ئێران تەقە لە دەستەیەک کۆڵبەر دەکەن کە لە ئاکام دا کەسێک بە ناوی زانست حەسەن نژاد ٢٥ ساڵانە بە تەقەی ڕاستەوخۆ دەپێکرێ و هەرلەوێ گیانی خۆی لەدەست دەدا.
لەلایەکی ترەوە ڕۆژی سێ شەممە ١١ی خەرمانان لە سنووری ناوچەی نەوسوود، هێزەکانی چەکداری سنووری ئێران دەستڕێژێک لە کۆڵبەران دەکەن و کەسێک بە ناوی حەمید حسێنی ٢٧ ساڵانە خەڵکی شاهۆی سەر بە ڕوانسەر بە فیشەک بریندار دەبێ و دواتر بۆ یەکێک لە نەخۆشخانەکانی ئەو شارە دەگوازرێتەوە.
