ئەمڕۆ ڕێکەوتی 26 مای ساڵی 2018 زایینی
آموزش وردپرس

ڕاپۆرتی پێشێلکارییه‌کانی مافی مرۆڤ له‌ ڕۆژهه‌ڵاتی کوردستان – لە ساڵی 1395 – 2016

ڕاپۆرتی به‌شێک له‌ پێشێلکارییه‌کانی مافی مرۆڤ له‌ ڕۆژهه‌ڵاتی کوردستان به‌هۆی کۆماری ئیسلامی له‌ ساڵی 1395ی هه‌تاوی‌دا

 لە ماوەی ساڵی 1395ی هەتاوی‌دا هەر نەبێ 492 حاڵەتی زبری پێشێلکردنی مافی مرۆڤ لە ڕۆژهەڵاتی کوردستان ڕووی داوە کە ناوەندی مافی مرۆڤ بۆ ڕۆژهەڵاتی کوردستان تۆماری کردوون.

به‌ پێی بانکی زانیاریی ناوه‌ندی مافی مرۆڤ بۆ ڕۆژهەڵاتی کوردستان له‌ ماوەی ئه‌م ساڵدا هێزه‌کانی کۆماری ئیسلامی له‌ کوردستان لانیکەم 52 کۆڵبەر و کاسبکاری کوردیان بە تەقەی ڕاستەوخۆ کوشتووە. هه‌ر به‌هۆی ڕاوه‌دوونانی هێزه‌ چه‌کداره‌کانی کۆماری ئیسلامی 14 کۆڵبه‌ری دیکه‌ی کورد به‌هۆی به‌ربوونه‌وه‌ له‌ به‌رزایی، سه‌کته‌ی دڵ، سەرمابردوویی و کەوتنە ژێر ڕنوو گیانیان له‌ده‌ست داوه‌.

لەو هێڕش و کۆمەڵکوژییەی کۆڵبەران و کاسبکارانی ناوچە سنوورییەکان‌‌دا 36 که‌سیش بریندار بوون و وێرای کوشتنی ژمارەیەکی زۆر وڵاغی کاسبکاران،هێزەکانی کۆماری ئیسلامی دەستیان بەسەر سەدان میلیۆن تمەن باری کاسبکاران داگرتوە.

لە ماوەی ئەمساڵدا 62 زیندانیی کورد له‌ زیندانه‌کانی ئێران‌دا له‌ سێداره‌ دراون کە وه‌ک ناوه‌نده‌ ڕه‌سمییه‌کانی کۆماری ئیسلامی باسیان کردوه‌ ئه‌و که‌سانه‌ به‌ تۆمه‌تی کڕین و فرۆشتنی ماده‌ی هۆشبه‌ر له‌دار دراون، هەروەها یەک لەوان بە ناوی محەممەد عەبدوڵڵاهی بە تاوانی ئەندامەتیی حیزبێکی کوردیی دژبەری کۆماری ئیسلامی لە دار درا. هەر لە ماوەی ئەمساڵ‌دا 3 زیندانی لە بەندیخانەکان‌دا بە شێوەی گوماناوی گیانیان لە دەست داوە.

تەقینەوەی مینی چێندراو لەلایەن کۆماری ئیسلامی لە ماوەی ئەمساڵیش‌دا لانیکه‌م 26 قوربانیی لێکەوتەوە. بە هۆی ئەو تەقینەوانە هەر نەبێ 6 کەس گیانیان لە دەست داوە و 20  کەسیش بریندار بوون.

ده‌زگا ئه‌منیه‌تییه‌کانی کۆماری ئیسلامیش له‌ کوردستان له‌ ماوه‌ی ئەم ساڵ‌دا ئه‌وه‌نده‌ی زاندراوە، لانیکه‌م 288 که‌سیان به‌ تۆمه‌تی چالاکیی سیاسی و هاوکاریکردنی حیزبه‌ کوردستانییه‌کان قۆڵبه‌ست کردوه‌. ژماره‌یه‌ک له‌و گیراوانه‌ تا کاتی دادگایی کردنیان به‌ بارمته‌ی قورس ئازاد کراون و لانیکه‌م 85 که‌س له‌وانه‌ دوای به‌ ناو دادگایی کرانیان سزای لە ٣ مانگ زیندان‌ڕا تا 25 ساڵ زیندانیان به‌ سه‌ر دا سه‌پاوه‌ و سەرجەم ئەو 85 کەسە  بە 5852 مانگ زیندان مەحکووم کراون. هەروەها  دوو زیندانیی سیاسیی کورد که‌ هه‌ر کام زیاتر له‌ 10 ساڵه‌ له‌ زیندان دا، یه‌کیان به‌ تاوانی نامه‌ نووسین بۆ ئه‌حمه‌د شه‌هید سزای 5 ساڵ و ئه‌وی دیکه‌یان به‌هۆی دروستکردنی په‌روه‌نده‌یه‌کی ئه‌منیه‌تی دیکه‌ له‌ دژی سزای 10 ساڵ و سه‌رجه‌م 15 ساڵ سزای زیاده‌یان به‌سه‌ردا سه‌پاوه‌.ده‌زگای دادی کۆماری ئیسلامی هه‌روه‌ها دوو زیندانیی سیاسیی به‌ تۆمه‌تی چالاکیی ئه‌منیه‌تی دادگایی کردوە‌ و سزای ئێعدامی به‌سه‌ردا سه‌پاندوون‌.

سیاسه‌تی سه‌رکوتی کۆماری ئیسلامی له‌ حه‌وزه‌ی زانکۆ و قوتابخانەکانیش دا دژی کورد به‌رده‌وام بوه‌ و له‌ ماوه‌ی ئەمساڵ‌دا4 مامۆستای زانکۆ و خوءندنگەکان به‌ بڕیاری ناوه‌نده‌ ئه‌منیه‌تییه‌کان له‌ وانەبێژی بێبەش کراون‌ و هەر به‌ بڕیاری ناوه‌نده‌ ئه‌منیه‌تییه‌کان ڕێ لە درێژەدان بە خوێندنی دوو خوێندکاری کورد گیراوە.

ماشێنی تێرۆر و سەرکوتی کۆماری ئیسلامی و کردەوەکانیان لە دژی حیزبی دێموکڕات ئەمساڵیش‌ کۆمەڵێک قوربانیی لێکەوتەوە.

لە چەند ڕووداو و لەچەند شوێنی جیاوازدا لە کاتێکدا پێشمه‌رگه‌کانی حیزبی دێموکڕاتی کوردستان و حیزبی دێموکڕاتی کوردستانی ئێران بۆ کاری ڕێکخراوه‌یی و گرتنی کۆڕ و کۆبوونه‌وه‌ له‌گه‌ڵ خه‌ڵک لە نێو خۆی وڵات‌دا جووڵەیان بووە، له‌لایه‌ن هێزه‌ چه‌کداره‌کانی کۆماری ئیسلامی هێرشیان کرایه‌ سه‌ر و خراونەتە کەمینەوە.هەروەها دەستی ڕەشی تێرۆری کۆماری ئیسلامی لە شەوی یەڵدا، ( 21ی دێسامبری 2016) دا گەیشتە بنکەیەکی حیزبی دێموکڕات و لەوزنجیرە ڕووداوەدا 21 پێشمەرگە و تێکۆشەری کورد بوونە قوربانیی سیاسەتی تێرۆری کۆماری ئیسلامی.

شایانی باسه‌ ئه‌و ئامارانه‌ ته‌نیا به‌ پێی ئه‌و هه‌واڵ و زانیارییانه‌ ئاماده‌ کراوه‌ که‌ به‌ ده‌ستی ناوه‌ندی مافی مرۆڤ گه‌یشتوون و ناو و نیشانیان به‌ روونی ئاشکرا کراون، ئه‌گینا به‌ دڵنیاییه‌وه‌ قوربانیانی سیاسه‌تی توندو تیژی و پێشێلکاریی مافی مرۆڤ له‌ کوردستان زۆر له‌وه‌ زیاترن که‌ لێره‌ دا ناویان هاتوه‌ و ئاماژه‌یان پێ کراوه‌.

ئه‌وه‌ خواره‌وه‌ش خشته‌ی پێشێلکارییه‌کانی مافی مرۆڤ له‌ کوردستان به‌ هۆی کۆماری ئیسلامی له‌ ماوەی یەک ساڵی1395ی هەتاوی دایه‌, کلیکی ئەو لینکە بکە بۆ داونلۆدی هەموو راپۆرتەکە..

ڕاپۆرتی پێشێلکارییه‌کانی مافی مرۆڤ له‌ ڕۆژهه‌ڵاتی کوردستان – لە ساڵی 1395 – 2016

 

کۆمێنتی خۆت لەسەر ئەو بابەتە بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

*

code