چاونیوز:
بۆنەی گەردوونی ڕۆژی ئافرەت، وەک گشت بۆنە گەردوونییەکان، ڕۆژێکی پیرۆز نییه و بە مەبەستی پیرۆزبایی کردنیش ڕۆ نەنراوە. بابەتەپیرۆزەکان، لە سەر پانتایەکی ساویلکانەی باوەڕمەندی، لە شیپانەی ئولێکدا، ڕۆدەنرێن و خەڵک گرتنی ئەو ئەو بۆنەگەلە بە ئەرکی ئۆلدارانە دەزانێت و چاوەڕوانی پاداشتی خودای لێ هەیە.
هەشتی ماڕس، وەک بۆنەکانی تری گەردوونی، هەنگاوێکی ڕووناکبیرانە و مرۆڤدۆستانەیە بۆ داکۆکی کردن لە بابەتی دیاریکراو. ئەو بۆنە بە مەبەستی هەڤڕکی لەگەگەڵ ئاپاڕتایدی ڕەگەزی لە لای ناوەندەکانی ڕووناکبیری گەردوونی و لە چوارچێوەی مافەکانی مرۆڤ دا داندراوە، کە ئاپاڕتایدی ڕەگەزی زۆر زۆریش لەگەڵ تابۆ و بڕوا پیرۆزەکان دا یەکانگیرە، کەوابی هەشتی ماڕس بەگژ بایەخە پیرۆزکراوەکان و هزری ئاپاڕتایدی ئۆلی و چاندی دا دەچتەوە. ڕۆژی ئافرەت، ڕۆژی منداڵ، ڕۆژی کرێکار و… هەمووی ئەوانە هەنگاوێکی ڕووناکبیرین بەرەو مافی بەرامبەری و یەکسانی مرۆڤ، بێ هەڵاواردنی ڕەگەزی، دینی، ئەتنیکی و….کە ئەو نایەکسانی و ئاپاڕتایدانە، زۆربەیان بۆ جڤاکەکان پیرۆزن. وەک ئۆلەکانی سیمەتیک که ڕەگەزی مێیینە، وەک بەرمڵکی نێرینە دەنرخێنن و مەبەستی ٨ی ماڕس، ڕێک سرینەوەی ئەو تێگەیشتنەیە.
ڕۆژی ئافرەت، پینگاڤێکی ڕۆناکبیرانەیە بەگژ ئاپاڕتایدی پیرۆزی ڕەگەزی دا دەچێتەوە، پێویستە لە جێگەی پیرۆزبایی کوتنی ئەو بۆنەی بە گژ پیرۆزی دا دەچتەوە، لە هۆکار و مەبەستی ئەو بۆنە تێبگەین و هەوڵ بۆ درێژەدانی پینگاڤەکانی ،، ڤیرجینا ڤۆڵڤ، کڵاڕا زیتکین، سیمۆن دووبوار و… بدەین.
هەشتی ماڕستان بیر دەهێنمەوە، لێتان پیرۆز ناکەم، بەڵکوو داکۆکی دەکەم هیچ بەربەستی پیرۆز، نابێت ڕێگەی ڕەخنەدانی هەڵاواردنی ڕەگەزی بگرێت.
ئێستا لە وڵاتی ئێمەدا بۆنەی “ڕۆژی باوک” و بۆنەی “ڕۆژی ئافرەت” هاوکاتن و هەڤڕک و تەنانەت دژبەری یەکترن، چوونکە یەکەمیان بۆنەیەکی پیرۆزە و ئەوی تر، هەوڵی لابردنی نایەکسانی ڕەگەزی دەدات کە لە ئایدۆلۆژیای بەستێنی بۆنەی یەکەم دا، ئەو نایەکسانییە، پیرۆزە. یەکەمیان لە ئۆلیک وەرگیراوە کە داکۆکی فرەژنی و بەرملکی ئافرەت دەکات و بەستێنی بۆنەی ٨ی ماڕس، مافی مرۆڤە و فرەژنی و نێرینی بەرملکی ئافرەت، بە تاوانی دژەمرۆڤ دەناسێت. ڕۆژی باوک، ڕۆژی لەدایکبوونی هاڤی عەلی، لە سەرۆکە بەباندۆڕەکانی ئیسلام بووە و بە پێی مێژوو زۆر بۆ پەرەی ئیسلام و سڕێنەوەی بڕواکانی تر تێکۆشاوە و پەرستگە و بووتخانەی خەڵکانی تری وێران کردووە که ئەوهەیش لە شیپانەی پەڕگاڵی مافی مرۆڤدا، تاوانی دژە مرۆڤانەیە. هەڵبەت ئێستا ڕوناکبیرانی مەزهەبی هەمووی جەنگەکانی ئیسلام بە “خۆپاراستن” دەزانن و پێیان وایە ئەو ئادگارە هێرشبەرانەی مێژوو بۆ ئیسلامیەکانی سەرەتاو و یەک لەوان هافی عەلی خەمڵاندووە، چەواشەیە. دیاره ئەگەر وا بێت ئەوا نێرینی پەڕگاڵی مافی مرۆڤیش دەگۆڕێت بەڵام ئادگاری دژەئافرەتی ئەو ئۆلدارانە و هاڤی عەلییش هەر لەو مێژووە دا هاتووە، کە ئەگەر ڕاپۆڕتی فرەژنی ئەوان چەواشە نەبێت، ئیدی لەگەڵ ئامانجەکانی هەشتی ماڕس، تەواو ناتەبان.
ڕه‌حیم فتووحی
