ئەمڕۆ ڕێکەوتی 16 ته‌مموز ساڵی 2019 زایینی
آموزش وردپرس

هەڵاواردن و بە زیندوویی کوشتن لەسۆنگەی کوردبوونەوە

شۆڕش ڕەحیمی

مرۆڤی ئازاد و سەربەست، واتە مرۆڤی ئاسایی و سڤیلی کورد لە ئێران لە زۆربەی مافەکانی بێبەشە، جا لەو نێوەدا بڵێی بارودۆخی زیندانیی سیاسیی کورد چۆن بێ؟ بێگومان تاڵتر لە بەسەرهات و بارودۆخی بەندیی سیاسیی کورد لە ئێران دەست ناکەوێ. با ئاماژە بە تازەترین ڕووداو بکەین:

محەممەد نەزەری، زیندانیی سیاسیی کوردە کە بە تۆمەتی ئەندامەتیی حیزبی دێموکراتی کوردستان 25 ساڵە بەند کراوە، وە لەو 25 ساڵەدا تاقە یەک ڕۆژ مەرەخەسیی نەدراوەتێ. محەممەد نەزەری 25 ساڵ پێش ئێستا دەسبەسەر و بە تاوانی “کوردایەتی” و چالاکیی سیاسی سەرەتا حوکمی ئێعدامی بەسەردا سەپا. سزای ئەو دوای چەند جار داوای پێداچوونەوە لە دادگای تێهەڵچوونەوە و هەروەها دیوانی بەرزی وڵات، دوای 5 ساڵ بێنەوبەرە بە زیندانیی تاهەتایی گۆڕا. ئێستا محەممەد نەزەری 25 ساڵە لە زیندانە و بێبەش لە هەر مافێکی مرۆیی.

دواهەواڵەکان باس لەوە دەکەن کە گەدەی ئەو زیندانییە سیاسییە تۆمۆری تێ کەوتووە و پێویستە لە نەخۆشخانەیەک لە دەرەوەی زیندان چارەسەر بکرێ، بەڵام سەرەڕای داوای ئەو و پێداگریی پارێزەرەکەی و بۆچوونی پزیشکەکانی زیندان؛ ڕێ لە بەڕێکردنی بۆ نەخۆشخانە دەگیرێ.

بەپێی ئەو هەواڵانەی لە بەندیخانەوە دزەیان کردوە و ئەم زانیارییانەی لە زاری محەممەدحوسێن ئاقاسی، پارێزەرەکەی بڵاو بۆتەوە، بارودۆخی جەستەیی محەممەد نەزەری زۆر خراپە و جیا لە کێشەی ڕووحی و دەروونی کۆمەڵە نەخۆشییەکیش بەرۆکی گرتووە. ناوبراو ددانەکانی هیچی نەماون و دیسکی ملی گرتووە و دەست و لاقی لەپڕ لە جووڵە دەکەو؛ بەڵام کەس ئاوڕی لێ ناداتەوە. لە ماوەی 24 ساڵی ڕابردوودا کە محەممەد نەزەری لە زیندان بووە، بەهۆی هەژاری و بێدەرەتانیش تەنیا و تەنیا خواردنەکانی نێو زیندانی خواردوە و کەس نەبووە پووڵ و پارەی بۆ تێبکا تا بتوانێ گۆشت و میوەش بخوا.

محەممەد نەزەری لە هەموو مافێکی ئینسانی بێبەش کراوە و تەنانەت دوای مردنی دایک و باوکیشی ڕێگەیان نەدا هەتا سەر قەبران بچێ و لە ڕێوڕەسمی ناشتنەکەیاندا بەشدار بێ.

بارودۆخی محەممەد نەزەری تەنیا نموونەیەکی بچووکە لە ڕەوشی زیندانیانی سیاسیی کورد لە بەندیخانەکانی کۆماری ئیسلامیی ئێراندا. کەم نین ئەو زیندانییانەی لە بەندیخانەکاندا لەژێر ئەشکەنجەدا کوژراون، یان ئەو بەندییانەی بەهۆی کەمتەرخەمیی کاربەدەستان و پێڕانەگەیشتنی پزیشکییەوە مردوون. مانگرتن وەک تەنیا چەکی بەرگریی زیندانیان هەتا ئێستاش نەیتوانیوە هیچ لە بارودۆخی ئەوان بگۆڕێ. ئەزموونی مانگرتنی زیندانیانی سیاسی و کەسانی وەک محەممەد سدیق کەبوودوەند لەمبارەیەوە بۆ هەموو لایەک ئاشکرایە.

ئەو گوشارە زۆر و سەختانەی دەخرێتە سەر زیندانیانی سیاسیی کورد و هەموو ئەو بێمافی و هەڵاواردنانە بۆ ئەوەیە ئیرادەی بەندیی سیاسیی کورد تێک بشکێ و لە زینداندا پاسیڤ ببێ و لۆمەی خۆی و ڕابردووی بکا و بکەوێتە خانەی پەشیمانی و دژایەتی لەگەڵ بۆچوونەکانی. ئەم گوشارانە بۆ خەساندنی زیندانیی سیاسی و دوورخستنەوەیان لە باوەڕی شۆڕشگێری و پەراوێزخستنیان لە ڕووحی بەربەرەکانییە؛ سیاسەتێک کە چل ساڵە ڕێژیم لەسەری دەڕوا و نموونە “محەممەد نەزەری”یەکان پێمان دەڵێن کە چەندە سیاسەتێکی شکست خواردوویە.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

*

code