ئەمڕۆ ڕێکەوتی 22 ئاب ساڵی 2019 زایینی
آموزش وردپرس

بکوژەکەی د. قاسملوو بەڕێوەبەری “سایپا”یە

ناکۆکیی نێوان عەلی دایی، ڕاهێنەری یانەی سایپا لەگەڵ بەڕێوەبەریی ئەم یانەیە کاری گەیاندە ئەو جێیەی عەلی دایی پەردە لەسەر کەسایەتیی “موستەفا مودەبیر” لابدا. ئەو گوتی کەسێک بەو ناوە هەر ناناسێ، چونکی “موستەفا مودەبیر”ێک هەر لە گۆڕێدا نییە و ناوبراو هەر هەمان “سردار غفور درجزی”ی ئەردەبیلی‌یە. بەڵام ئەو “سەردار غەفووری”یەی ڕاهێنەری سایپا باسی دەکا لە ڕاستیدا کەس نییە جگە لە “ئەمیر مەنسوور بوزورگیانی ئەسڵ” کە یەکێک لە ئەندامانی تیمی تێرۆری ڤییەن بوو کە لەودا دوکتور عەبدولڕەحمان قاسملوو، سکرتێری گشتیی حیزب و عەبدوڵڵا قادری‌ئازەر، ئەندامی کۆمیتەی ناوەندی و هاوڕێکەیان کەوتنە بەر دەستڕێژ و شەهید بوون.
لە بەڵگەکانی تێرۆری ڤییەندا هاتوە کە تیمی وتووێژ (تێرۆریست)ی کۆماری ئیسلامیی ئێران لە محەممەد جەعفەر سەحراڕوودی، مستەفا مستەفەوی (ئاجودی)، غەفوور دەرجەزی (ئەمیر مەنسوور بوزورگیان) پێک هاتبوون کە لەگەڵ دوکتور قاسملوو، عەبدوڵلا قادری‌ئازەر و د. فازیل ڕەسووڵ بۆ دانوستان لەسەر پرسی کورد! کۆ ببوونەوە. لەو دانیشتنەدا ئەمیر مەنسوور (سەردار غەفوور) بەرپرسی پاراستنی ئەمنیەتی! لایەنی ئێرانی بووە.
تیمی تێرۆری ئێران دوای جێبەجێکردنی ئەرکەکەیان گەڕانەوە نێوخۆی ئێران، بەڵام بەردەوام ناوەکانیان گۆڕاوە و ئێستا “سەردار غەفوور”، ئەندامی سپای قودسی پاسداران و یەک لە بکوژانی شەهیدانی تێرۆری ڤییەن بووەتە “موستەفا مودەبیر” و بەڕێوەبەرایەتیی “سایپا”ی دراوەتێ.
لە دادگای مێکونووس و لێکۆڵینەوە لە پەروەندەی تێرۆری دوکتور سادق شەرەفکەندی و هاوڕێیانی دابوو کە یەکەمجار ناوی “سەردار غەفوور دەرجەزی” هات. ئەبولقاسم مسیباحی، شایەتی سەرەکیی دادگای مێکونووس ئاشکرای کرد کە “غەفوور دەرجەزی” بەرپرسی “زانیاری و عەمەلیات”ەکانی سپای پاسداران لە کوردستان و ڕۆژئاوای ئێران بووە و ڕۆڵی سەرەکیی هەبووە لە ڕێکخستنی دانوستان لەگەڵ دوکتور قاسملوو بۆوی بەرەو بۆسەی مەرگی ڕەکێش بکا.
بنیاتی بروومەند و زۆر دامەزراوە حقووقیی دیکە و ڕێکخراوەکانی داکۆکی لە مافی مرۆڤ “غەفوور دەرجەز”ی بە یەکێک لە بکوژانی شەهید دوکتور قاسملوو دەناسن کە پۆلیسی ڤییەن دوای تێرۆرەکە دەستبەسەری دەکا، کەچی پاش ماوەیەک بەری دەدا و بەڕێی ئێرانی دەکاتەوە.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

*

code