سمایل شەرەفی
ڕاست لە ماوەی یەک مانگی ڕابردوودا چوار چالاکی سیاسیی کورد بە ناوەکانی؛ زانیار و لوقمان مرادی، ڕامین حوسێن‌پەناهی و کەماڵ ئەحمەدنژاد لە لایەن رێژیمی کۆماری ئیسلامی ئێرانەوە لە سێدارە دراون. هەر ئەمڕۆ سێ‌شەممە، رێکەوتی ١٧ی رەزبەر، دوای ماوەیەک چاوەڕوانی، دیوانی باڵای دادڕەسیی کۆماری ئیسلامی ئێران ڕایگەیاند کە بەندکراوێکی دیکەی سیاسیی کورد بە ناوی “هیدایەت عەبدوڵڵاپوور”، خەڵکی شاری شنۆ حوکمی لە سێدارەدانی بەسەردا سەپێندراوە.
زیندانیانی سیاسیی کورد بە وتەی زۆربەی پارێزەرەکانیان نەتەنیا بێ‌بەش لە دادگاییکردنێکی عادڵانە و ئازادن، بەڵکوو لە ژێر گوشار و ئەشکەنجەی دەزگا ئەمنیەتییەکانی رێژیم دا ناچار بە دانپێدانانی زۆرە ملیی تاوانگەلێک دەکرێن کە قەت ئەنجامیان نەداون. ئەوان کە زۆربەی کات بە تاوانی ئەمنیەتی تۆمەتبار دەکرێن، لە رەوتی لێپرسینەوەیەکی تاقەتپڕوکێنی ژوورەکانی جەنایەت و ئەشکەنجەدا، ناچار دەکرێن دان بە جۆرە توانێک دا بنێن کە بە پێی یاسا نگریسەکانی ئەم رێژیمە، حوکمەکەی تەنیا مەرگە.
هەر ئەم چوار بەندکراوە سیاسییەی کە لە ماوەی یەک‌مانگی ڕابردوودا بە تاوانی جۆراوجۆر حوکمی لە سێدارەدانیان بە سەردا سەپێندرابوو و ئێعدامیش کران، لە ژێر فشاری ئەشکەنجەی جەلادەکان‌دا، ناچار بە دانپێدادانی زۆرەملی لە سەر قەتڵ کران و بەزۆر وتوێژی تلوێزیۆنییان پێ کرا. کەماڵ ئەحمەدنژاد کە بە تاوانی ئەندامێتی لە حیزبی دێموکراتی کوردستان‌دا دەستبەسەر کرابوو، دوای ماوەیەک ئەزیەت و ئازار و ئەشکەنجە، بەزۆر ناچاریان کرد دان بە تاوانێک‌دا بنێ کە دواتر خودی بەرپرسێکی زیندانی شاری میاندواو دانی بەوەدا نابوو کە کەماڵ بە هیچ شێوەیەک بەشداری لە وەها تاوانێک‌دا نەکردبوو و بە بێ‌تاوان لە سێدارە دراوە.
لە پێوەندی لە گەڵ زانیار و لوقمان مرادیش‌دا بە هەمان شێوە بوو. ئەوان کە لە سناریۆیەکی دەستکرد‌دا تومەتبار بە کوشتنی کوڕی ئیمام جومعەی شاری مەریوان کران، دوای ئەوەی ئیمام جومعەی ئەمشارە لە چەند شوێنێک‌دا دانی بەوەدا نابوو کە ئەم دوو کەسە رۆڵێکیان لە کوشنی کوڕەکەی‌دا نەبووە، دەزگا ئەمنیەتییەکانی ڕێژیم لە پارێزگای سنە هەوڵیان‌دا حاڵەتی ئەم دوو پەروەندەیە لە سکاڵای تایبەتییەوە بگۆڕن بۆ سکاڵای گشتی و بەرگێکی تەواو ئەمنییەتییان بە بەردا کرد و لە کۆتایی‌دا زانیار و لوقمان بە بێ‌ئەوەی تاوانێکیان کردبێ، لە رێکەوتی ١٧ی خەرمانانی ئەمساڵ‌دا لە گەڵ ڕامین حوسێن‌پەناهی، هاوکات لە گەڵ هێرشی مووشەکیی سپای پاسدارانی رێژیم بۆ سەر قەڵای دێموکرات لە سێدارە دران.
دەزگا ئەمنییەتییەکانی رێژیم کە دەیانزانی خەڵکی کوردستان هیچ باوەڕێکیان بە بڕیارەکانی دەزگای دادوەریی رێژیم و دادگاکانی ئەم رێژیمە بە تایبەت لە کوردستان نیە و بە هیچ شێوەیەک تێکۆشەرانی بەندکراوی سیاسیی خۆیان بە تاوانبار نازانن و، هەروا بە ئاسانی ناهێڵن ئەم جینایەتە بەسەررێژیم‌دا تێپەڕێت، بۆ داپۆشینی ئەم جەنایەتە لە پەنا کردوەیەکی تێرۆریستیی گەورەتردا، هاوکات لە گەڵ هێرشی مووشەکیی بۆ سەر کۆبوونەوەی رێبەریی حیزبی دێموکراتی کوردستان لە قەڵای دێموکرات، ئەم سێ بەندکراوە سیاسییە بێ‌تاوانەیان لە سێدارەدا. بۆ لە سێدارەدانی کەماڵ ئەحمەدنژادیش درووست حەتوویەک دوای مووشەکبارانەکە و لە سێدارەدانی ئەم سێ کەسە کە چەند رۆژ دواتری لە ٢١ی خەرمانان‌دا خەڵکی کوردستان بە نیشانەی نارەزایەتی بەم رووداوانە مانگرتنی گشتییان بەڕێوە برد، حکمەکەیان جێبەجێ کرد بۆ ئەوەی دەنگدانەوەیەکی ئەوتۆی نەبێ.
ڕاگەیاندنی حوکمی لە سێدارەدانی بەندیی سیاسیی کورد، هیدایەت عەبدوڵڵاپوور کە تۆمەتبار بە ئەندامبوون لە یەکێک لە حیزبە کوردییەکان کراوە، لە هەلومەرجی ئێستادا و دوای ئەو مانگرتنە پڕمانایەی ٢١ی خەرمانان، بە مەبەستی چاوترسێنکردنی خەڵکی کوردستان، پەیامێکی ئەمنییەتیی لە پشتە. هیچ گومانیش لەودا نیە دادگایی کردنی هیدایەتیش وەک هەموو بەندییە سیاسییەکانی پێش خۆی، بە پرۆسەیەکی ئەمنیەتیی پڕ لە ئەشکەنجە و ئازاردا تێپەڕیوە. لە هەموو ئاوانە روونتر هەڵوێست و ئیرادەی خەڵکی کوردستان دژ بە سیاسەتی پەت و سێدارەی ڕێژیمی کۆماری ئیسلامی ئیڕانە کە لێبڕاوانەتر لە هەمیشە پێداگری لە وەدەستهێنانی مافە نەتەوەیی و ئینسانییەکانی خۆی دەکات و بۆ پێشەو هەنگاو دەنێ.
