چاونیوز: درێژەی بەشی هەژدە…
بنەمای یەکەم لەسەر بەرانبەری تاکەکان و ئەوەیکە هەموولایەک لە مافی یەکسان و ئازادییە سەرەکییەکان بەرخوردارن، تەکەزی دەکات. ئەم بنەمایە هیچ ڕادەیەک بۆ ئازادی جگە لە ئازادییەکانی تر دانانێ. واتە تەنیا تشتێک کە ئازادییەکانی من سنووردار دەکا، ماف و ئازاداییەکانی ئەوانی ترە، من ناتوانم ئازادییەکانی خەڵکانی تر سنووردار بکەم.
بنەمای دووهەم وێنا کردنی جۆرێک جیاوازی لە ڕەوتی کێبڕکێی ژیان پارێزهەڵنەگر و ناچارەکی دادەنێ، هەربۆیە ئەم بنەمایە وەک بنەمای جیاوازی پێناسە دەکرێ. لێ، لەم بنواشەیەدا، یەکەم لەسەر بەڕێوەبەری جیاواز و کۆنترۆڵی ئەو بە قازانجی بێ بەهرەمەندترین تاکەکان پێدادەگری، واتە تەوفیری سەرچاوەگرتوو لە نوێکاری و داهێنەری و هەوڵ و کار، بەڕێکردنی ئازادی سامان بە فەرمی دەناسرێ، چوونکە ئەمجۆرە لە جیاوازییەکان بەرهەم هێنانی کار، سامان و دەرفەتی باشتر بۆ ژیان دەستەبەر دەکا و هەرچەندە دەرفەتی کار و بەرهەم زیاتر بێ، خەڵکانی بێ بەهرەمەند هاسانتر قازانجی لێدەکەن، دووهەم، ئەم بنواشەیە جارێکی تر بۆ دەستوێڕاگەیشتنی ئازاد، بەرانبەر و دادگەرانەی هەموولایەک بەو هەڵکەوتانەی کە ڕادەی قازانج و بەرژەوەندی تاکەکان جیاوازی دەخوڵقێنێ، پێداگری دەکا، سێهەم، بە پێێ ئەم بنواشەیە، دابەشکاری سەرلەنوێی سامان بە شێوەی وەرگرتنی باج و خەراج و ماڵیات و خەرج کردنی لە ڕێگای دابین کردنی ژیانێکی مناسب بۆ خەڵکانی بێبەهرەمەند و دابین کردنی دەستوێڕاگەیشتنی گشتی بە پەروەردە و ساخلەمی و شتی لەم چەشنەیە، ئاراستە دەکرێ. چوونکە لەم بنواشەیەدا تەکزکراویتە سەر ڕێکخستنی نابەرانبەرییەکان بە قازانجی خەڵکانی بێ بەهرەمەند.
-ڕەوشی یەکەمین و بەڵگەمەندی بۆ بنەمای دادپەروەری
ڕەوشی یەکەمین چییە؟ ئەو گرێبەستەی لە نێوان تاکەکانی کۆمەڵگا دەبەسترێ چ جۆرە ڕێکەوتنێکە؟ چۆن دەکرێ بەم شێوازە پێناسەیەکی تایبەت لە چەمکی دادپەروەری بکرێ؟ ڕەوشی یەکەمین کە گرێبەستی یەکەم تێدا ڕوودەدا ڕەوشێکی گریمانەییە. با ئاوای دابنێین کە هەموومان لە سەرەتای ژیان داین و دەمانهەوێ بنەمای هاوکاری کۆمەڵایەتی خۆمان لەو کۆمەڵگایەی کە لە دواڕۆژا دەمانهەوێ سازی بکەین، دابنێین و ئەم بنەمایانە بکەینە پێوانەی حاکم بەسەر ئەو گرێبەستەکانە کە دواتر لە هاوکاری کۆمەڵایەتی خۆمان پیویستیمان پێ دەبێ. بەڵام تایبەتمەندی گرنگی ئەم ڕەوشە لەوەدایە کە گشت لایەکمان ئاگاداری قازانج و بەرژەوەندی هەروەها جێگە و پێگەی خۆمان نین کە وا بڕیارە بچینە ناوی، واتە لە پشتەوەی پەردەی نەزانی داین، ئەم تایبەتمەندییە بە پەردەی نەزانی پێناسە دەکرێ، جا لەم بنەمایەدا و بە یارمەتی ئەم تایبەتمەندییە بەرسڤی ئەو پرسیارە دەدرێتەوە کە چۆنیەتی ڕێکەوتنی لەم ڕەوشەدا دەتوانێ بەڵگەمەند و بڕواپێکراو بێ…
