چاونیوز: مێرمنداڵێکی تەمەن ١٥ ساڵە لە کرماشان بەهۆی بڵاوکردنەوەی وێنەی ئاڵای کوردستان لەلایەن هێزە ئیتلاعاتییەکانەوە دەسبەسەر کرا.
بەپێی هەواڵی چاونیوز(ناوەندی مافی مرۆڤ بۆ ڕۆژهەڵاتی کوردستان)، لە ماوەی چەند ڕۆژی ڕابردوودا هێزەکانی ئیدارەی ئیتلاعاتی کرماشان لەگەڕەکی دەوڵەتاوای ئەو شارە مێرمنداڵێکی تەمەن ١٥ ساڵیان بە ناوی “دانیال کەرەمی” بەهۆی بڵاوکردنەوەی وێنەی ئاڵای کوردستان دەسبەسەر کردووە.
ناوەندە ئیتلاعاتییەکان بە بنەماڵەی دانیال کەرەمییان ڕاگەیاندووە کە ناوبراو لە تۆڕە کۆمەڵایەتییەکان وێنەی ئاڵای کوردستانی بڵاو کردووەتەوە و هەر بۆیەش دەسبەسەر کراوە و بۆ ئازادی کاتی دانیال کەرەمی داوای بارمتەی ١٠٠ میلیۆن تەمنییان کردووە، سەرەڕای ئەوەی کە بنەماڵەکەی ئەو بڕە پارەیان دابین کردووە بەڵام هێشتا ئازاد نەکراوە.
