چاونیوز: دوو کەسی تر لە شارەکانی مەریوان و سەقز لەلایەن هێزەکانی ئیتلاعات دەسبەسەر کران.
بەپێی هەواڵی چاونیوز، ئەمڕۆ هەینی ٢٣ی خەزەڵوەری ١٣٩٩ هێزەکانی ئیتلاعاتی سەقز هێرشیان بردووتە سەر ماڵی باوکی لاوێکی تەمەن ١٨ ساڵە بەناوی پویا بوستانی و بەشێوەیەکی پڕسووکایەتی ناوبراویان دەسبەسەر و بۆ شوێنێکی نەزانراو گواستووتەوە.
سەرچاوەیەک لەمبارەوە ڕایگەیاند، هێزە ئیتلاعاتییەکان ماڵی پویا بوستانیان بە تەواوەتی پشکنیوەتەوە و هەندێک کەرەسەی کەسی وەک موبایل، لەبتاپ و چەند کتێبێکیشیان دەگەڵ خۆیان بردووە.
لەلیەکی دیکەوە، لە درێژەی دەسبەسەر کرانەکانی مەریوان، ڕۆژی چوارشەممە ٢١ی خەزەڵوەر، هێزە ئیتلاعاتییەکان لە ئاوایی سەردۆش هاونیشتمانییەکی تەمەن ٣٠ ساڵە بەناوی ئیسماعیل ڕاستی دەسبەسەر و دەگەڵ خۆیان دەبەن.
بە گرتنی ئیسماعیل ڕاستی ژمارەی گیراوانی ئاوایی سەردۆشی مەریوان گەیشتە پێنج کەس کە لە دوو ڕۆژی سێ شەممە و چوارشەمە دەسبەسەر کراون.
هەتا ئێستا نازانرێ ئەو شەش لاوە بە چ تۆمەتێک گیراون و لەکوێ ڕادەگیرێن.
