هەواڵەکان باس لەوە دەکەن کە لە نیوەی دووهەمی مانگی خاکەلێوەوە کۆڵبەرەکان بیمە دەکرێن، ئەوەش کە چەند کەس لەوان بیمە دەکرێن و بە گشتی کۆڵبەر و کۆڵبەری لای کاربەدەستان چۆن پێناسە دەکرێ با بمێنێ؛ بەڵام ئایا بیمەکردنی کۆڵبەرەکان کێشە و ئاستەنگەکانی ئەوان چارەسەر دەکا؟
شاکر ئیبراهیمی،بەڕێوەبەری کانوونی شوڕا ئیسلامییەکانی کار لە پارێزگای سنە لە لێدوانێکدا بۆ “ئیلنا”، هەواڵدەری کاری ئێران گوتی: ” بیمە کردنی کۆڵبەرەکان،ناتوانێ شوێنکاری لە سەر ژیان و بارودخی کاری سەخت و تاقەت‌پڕووکێنی ئەوان هەبێ.”
ئەو دەڵێ ورووژاندنی پرسی بیمەکردنی کۆڵبەرەکان لەلایەن کاربەدەستان لە ترسی گوشاری میدیاکانە و ئەوان دەیانەوێ کۆمەڵە کارێکی رواڵەتی بکەن،لە کاتیکدا ڕەخساندنی هەلی کار لە ناوچە سنوورییەکان، تاکە رێگەی چارەسەری ئەم پرسەیە.
ئەو چالاکە کرێکارییە پێی وایە تاکە قازانجی پڕۆژەی بیمەکردنی کۆڵبەرەکان ئەوەیە کە پشتیوانییەکی کاتی بۆ بنەماڵەکانیان دروست دەکا و دەبێتە هۆی ئەوەی لە ئەگەری هاتنەپێشێی ڕووداوێکی دلتەزێن بنەماڵەکانیان قەرەبوو بکرێنەوە،ئەگەرنا ئەو بیمەکردنە ناگاتە خانەنشینی، چوونکە کەس ناتوانێ ٢٠ یا ٣٠ ساڵ کۆڵبەری بکا.
ئیبراهیمی لە درێژەی لێدوانەکەی‌دا پێی لەسەر ئەوە داگرتوە کە بەرپرسان لە جیاتی ئەم چارەسەرە رواڵەتیانە ئەویش بۆ کپکردنی دەنگی ناڕەزایەتیی خەڵک و راگەیاندنەکان، واباشە بیر لە سڕینەوەی هەژاری لە ناوچە سنوورییەکان و خوڵقاندنی هەلی کار لەو ناوچانە بکەنەوە.
بابەتی بیمەکردنی کۆڵبەرەکان دوای ئەوە هاتە بەرباس لە گوترا لەسەر رەزامەندیی وەزیری کار، بڕیار وایە لە نیوەی دووەمی مانگی خاکەلێوەی ساڵی داهاتووەوە کۆڵبەرەکان بیمەی کۆمەڵایەتیان بدرێتێ.
شایانی باسە ئەو هەواڵە لە کاتێکدا بڵاو دەبێتەوە کە زستانی ئەمساڵ، ژمارەیەکی زۆر لە کۆڵبەرانی ناوچە سنوورییەکانی کوردستان بە هۆی کەوتنە ژێر رنوو گیانیان لە دەست دا، لەلایەکی دیکەوە ئەگەرچی راگەیاندنەکانی کۆماری ئیسلامی هەموو کاتێ خۆیان لە پرسی کۆڵبەران و گیانلەدەستدانیان و هەروەها ڕەفتاری هێزە چەکدارەکان بە نیسبەت ئەوان دزیوەتەوە، بەڵام کاردانەوە ئەو بابەتە لە تۆڕە کۆمەڵایەتییەکان هۆکارێک بووە هۆی ئەوە کە ئەم پرسە ببێتە بابەتێکی گرینگ و لە نێو چالاکان و ڕای گشتی‌دا ڕەنگدانەوەی زۆری هەبێ.
بە پێی ئامارە بڵاوکراوەکان،لە ناوچەی سەردەشت و پیرانشار هەشت تا دە هەزارکەس بۆ دابینکردنی بژێوی ژیانیان ڕوویان لە کۆڵبەری کردوە، کەچی فەرمانداری سەردەشت ئەوان وەک قاچاخچی ناو دەبا.
