کۆمیتەی سێهەمی ڕێکخراوی نەتەوە یەکگرتووەکان ڕۆژی پێنجشەممە، ٢٣ی خەزەڵوەر،بە پەسەندکردنی بڕیارنامەیەک جارێکی دیکەش پێشێلکردنی مافی مرۆڤی لە ئێران مەحکووم کرد.
لەو بڕیارنامەیەدا هاتووە کە گرتنی سەرەڕۆیانە لە ئێران درێژەی هەیە و بارودۆخی زیندانەکان کارەساتبارە و هەڵاواردن دژی ژنان و ئازاردانی کەمایەتییە ئایینییەکان جێی نیگەرانیی ئەم ڕێکخراوەیەن.
ئەم بڕیارنامەیە کە کانادا پێشنووسەکەی خستبووە ڕوو، بە ٨٤ دەنگی بەڵێ لە بەرامبەر ٣٠ دەنگی نەخێردا پەسەند کرا و هەروەها ٦٦ وڵاتیش دەنگی بێلایەنیان بەم بڕیارنامەیە دا. لەم بڕیارنامەیەدا داوا لە ڕێژیمی ئێران کراوە کە بە هەموو شێوەیەک هەڵاواردن دژی کەمایەتییە نەتەوەیی و ئایینییەکان لە ئێراندا ڕابگرێ.
