۱ی خەزەڵوەری ساڵی ۱۴۰۰ ھەتاوی
آموزش وردپرس

ڕاپۆرتی پێشێلکرانی مافی مرۆڤ لە کوردستان لە خاکەلێوەی ساڵی ١٤٠٠

کوژران و برینداربوونی ١٢ کۆڵبەر، دەسبەسەرکردنی ٤٠ کەس، خۆکوژی ١٢ هاونیشتمانیی و ئێعدامی ٩ بەندکراو

لە ماوەی مانگی خاکەلێوەی ئەمسا‌ڵ‌دا هەر نەبێ ٩٠ حاڵەتی زبری پێشێلکردنی مافی مرۆڤ لە ڕۆژهەڵاتی کوردستان ڕووی داوە کە ناوەندی مافی مرۆڤ بۆ ڕۆژهەڵاتی کوردستان تۆماری کردوون.

به‌ پێی بانکی زانیاریی ناوه‌ندی مافی مرۆڤ بۆ ڕۆژهەڵاتی کوردستان لەم مانگەدا‌ لانیکەم ١٢ کۆڵبەر و کاسبکاری کورد بە تەقەی ڕاستەوخۆ، یان بەربوونەوە لە شاخ بەهۆی ڕاوه‌دوونانی هێزه‌ چه‌کداره‌کانی کۆماری ئیسلامی کوژراون و بریندار بوون. لەو ١٢ کاسبکارە ٨ کەسیان بریندار بوون و ٤ کۆڵبەریش کوژراون یان گیانیان لە دەست داوە.

لەگەڵ ئەوەش‌دا ڕۆژی ٢٥ی خاکەلێوە هێزە چەکدارەکانی سپای پاسدارانی کۆماری ئیسلامی پەلاماری گوندی “مولیک”ی ماکۆیان دا و دەستڕێژیان لە کەسێک بە ناوی “ئەحمەد ئارسەن” کرد و کوشتیان. هەروەها ڕۆژی هەینی ٢٧ی خاکەلێوەش هێزە چەکدارەکانی ڕێژیم لە گەڕەکێکی شارۆچکەی ڕەبەت چەند کەسیان دایە بەر دەستڕێژی گوللە کە لە ئاکامدا کەسێک بە ناوی “خالید ڕەسووڵی” کوژرا و کەسێکیش بە ناوی “ئیبراهیم عەلی” بە توندی بریندار بوو.

کوژران و برینداربوونی ١٢ کۆڵبەر و کاسبکاری کورد لە مانگی سەرەتای ساڵی نوێ لەحالێک‌دایە کە لە ماوەی ساڵی ڕابردووش‌دا ٢٢٦ کۆڵبەر و کاسبکاری کورد بەهۆی تەقەی ڕاستەوخۆ، تەقینەوەی مین، بەربوونەوە لە بەرزایی لە سۆنگەی ڕاوەدوونان و هەروەها ڕەق‌هەڵاتن لە سەرما کوژرابوون یان بریندار ببوون. بەپێی ڕاپۆرتی “چاونیوز” لەو ٢٢٦ قوربانییەی دەستی غەدر و تاوان ٨٠ کەسیان کوژرابوون و ١٤٦ کەسیش بریندار بوون. هەروەها ٧ شوانکارە و چۆداریش لە ناوچە سنوورییەکان بەئانقەست لەلایەن هێزەکانی ڕێژیمەوە درابوونە بەر دەستڕێژ و گیانیان لێ ئەستێندرابوو.

لە یەکەم مانگی بەهاری ئەم ساڵدا هەروەها ۹ زیندانیی کورد ئێعدام کراون. “چاونیوز” ڕایگەیاندووە کە ئەم ٩ کەسە بە تۆمەتی پێوەندیدار بە مادەی هۆشبەر لەدار دراون.

ئێعدام‌کرانی ئەو ٩ بەندکراوە لە خاکەلێوەی ئەمساڵ لە حاڵێک‌دایە کە دەزگای قەزایی ڕێژیم لە ساڵی ڕابردوو (١٣٩٩)‌دا لانیکەم ٤٩ بەندکراوی لەدار دابوو کە چوار کەس لەوان بەندیی سیاسی بوون.

هەروەها ناوەندە ئەمنیەتییەکانی ڕێژیم لە ماوەی مانگی خاکەلێوەی ئەمساڵ‌دا لانیکەم ٤٠ کەسیان بە تۆمەتی چالاکیی ئەمنیەتی دژی کۆماری ئیسلامی و ئەندامەتی یان هاوکاری‌کردنی حیزبێکی کوردیی دژبەری کۆماری ئیسلامی دەستبەسەر کردووە.

بەپێی ڕاپۆرتی “چاونیوز” لەو ٤٠ کەسە چەند کەسێکیان دوای قۆناغی لێپێچینەوە بە دانانی بارمتە هەتا کاتی دادگایی‌‌ و حوکم‌درانیان ئازاد کراون و ١٣ کەس لەوان دادگایی و سزای لە یەک هەتا ٢٦ ساڵ سەرجەم (١٠٧ ساڵ و ٦ مانگ) زیندانیان بەسەردا سەپاوە.

هەروەها ڕۆژی یەکشەممە ١ی خاکەلێوە بەندکراوێکی کورد بە ناوی “شەهاب دەروون پەروەر” تەمەن ٣٥ سال و خەڵکی شائاباد لە بەندیخانەی ناوەندیی ئەو شارە بە هۆی خوێنبەربوونی گەدە و پیڕانەگیشتنی پزیشکییەوە گیانی لە دەست دا.

دەسبەسەرکرانی لانیکەم ٣٩ کەس لە مانگی سەرەتای ساڵی نوێ لە حاڵێک‌دایە کە لە ماوەی ساڵی ڕابردوو (١٣٩٩)ش‌دا هەرنەبێ ٦٤٠ کەس لە خەڵکی ئاسایی و چالاکانی مەدەنی و سیاسی لەلایەن دەزگا ئەمنیەتییەکانەوە بەتۆمەتی چالاکیی ئەمنیەتی و سیاسی لە دژی کۆماری ئیسلامی و بەرژەوەندییەکانی ئەو ڕێژیمە گیرابوون. لەو ٦٤٠ کەسە لانیکەم ١٨٩ کەسیان دادگایی و سزای لە سێ مانگ تا سزای درێژخایەنی ٢٥ ساڵ زیندان و تەنانەت سزای ئێعدامیان بەسەردا سەپابوو. هەروەها لەو بەندکراوانە سێ کەسیان بە تۆمەتی ئەندامەتی لە حیزبە سیاسییەکانی دژبەری ڕێژیم سزای ئێعدامیان بەسەردا سەپابوو و حوکمی ئێعدامی دوو بەندکراوی سیاسیی کوردیش لە دادگای تێهەڵچوونەوەدا پشتڕاست کرابۆوە. هەروەها دوو بەندکراوی سیاسیی کوردیش لەژێر ئەشکەنجەدا گیانیان لێ ئەستێندرابوو.

خۆکوژی، هەر وەکوو هەمیشە دیاردەی تڕاژیکی کوردستانە بوو. لە مانگی خاکەلێوەی ئەمساڵدا لانیکەم زیاتر لە ٢٥ کەس خۆیان کوشتوە کە ناوەندی مافی مرۆڤی ڕۆژهەڵاتی کوردستان شوناسی ١٢ کەس لەوانی ئاشکرا کردوە. لەو ژمارەیە ٧ کەسیان پیاو بوونە و ٥ کەسیشیان ژن.

“چاونیوز” پێشتر و لە ڕاپۆرتی ساڵانەی خۆی (تایبەت بە ١٣٩٩) ڕایگەیاندبوو کە لە ساڵی ڕابردوودا لانیکەم ١٥٣ کەس له‌و سه‌دان که‌سه‌ی به‌هۆی جۆراوجۆی وه‌ک هه‌ژاری، بێهیوایی و کێشه‌ی خێزانییەوە هه‌وڵی خۆکوشتنیان دابوو، هەوڵەکانیان سەرکەوتوو ببوو و کۆتاییان به‌ ژیانیان هێنابوو. لەنێو ئەو کەسانەدا که‌م ته‌مه‌نترینیان کچ و کوڕێکی ١٢ ساڵ و به‌ته‌مه‌نترینیان ژنێکی ته‌مه‌ن ٦٠ ساڵ بوو‌.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *