۳ی رەزبەری ساڵی ۱۴۰۰ ھەتاوی
آموزش وردپرس

به‌هۆی ته‌قینه‌وه‌ی مین دوو کۆڵبه‌ر له‌ بانه‌و پیرانشار بریندار بوون

له‌ ناوچه‌ سنوورییه‌کانی بانه‌ و پیرانشار به‌ هۆی ته‌قینه‌وه‌ی مین دوو کۆڵبه‌ر به‌ توندی بریندار بوون.

ناوه‌ندی دێموکراسی و مافی مرۆڤی کوردستان ڕایگه‌یاند که‌ ئێواره‌ی ڕۆژی دووشه‌ممه‌ ۲۴ی بانه‌مه‌ر، کۆڵبه‌رێکی ته‌مه‌ن ۳۰ساڵه‌ی خه‌ڵکی ئاوای باینده‌ره‌ی بانه‌ به‌ ناوی یادگار که‌ریمیان له‌ کاتی کۆڵبه‌ریدا به‌هۆی ته‌قه‌نه‌وه‌ی مین به‌ توندی بریندار بوو. ناوبراو که‌ له‌و ڕووداوه‌دا لاقێکی له‌ده‌ست دا، ئێستا بۆ چاره‌سه‌ریی پزیشکی له‌ نه‌خۆشخانه‌ی بانه‌ خه‌وێندراوه‌،

له‌ پیرانشاریش‌ ڕۆژی یه‌کشه‌ممه‌ ۲۳ی بانه‌مه‌ر کۆڵبه‌رێک به‌ناوی ڕه‌حمان ڕه‌سووڵی‌ئازه‌ر خه‌ڵکی ناوچه‌ی گه‌وره‌دێ پیران به‌هۆی ته‌قینه‌وه‌ی مین لاقێکی په‌ری.

به‌رده‌وامیی ته‌قیه‌نه‌وه‌ی مین له‌ کوردستان له‌کاتێک دایه‌ که‌ ڕێژیمی ئێران هه‌روه‌ها به‌رده‌وامه‌ له‌ به‌رهه‌مهێنان و هه‌نارده‌کردنی مینی تاکه‌که‌سی و، پێی وایه‌ که‌ ئه‌منیه‌تی سنووره‌کانی ته‌نیا له‌و ڕێگه‌یه‌وه‌ ده‌توانێ مسۆگه‌ر ببێ، به‌ڵام چالاکانی مه‌ده‌نی و کرێکاری ده‌ڵێن ئه‌و هه‌وڵانه‌ بۆ ڕێگری له‌ کاسبی و هاتوچۆی کۆڵبه‌ران و کاسبکارانی کوردن.

جێی باسه‌ که‌ له‌ ساڵی ڕابردووشدا ۴۳ که‌س له‌ کوردستان به‌هۆی ته‌قینه‌وه‌ی مین کوژراون و بریندار بوون. ده‌وڵه‌ت خۆی ‌و به‌پێی ئاماره‌ ڕه‌سمییه‌کانی ده‌ڵێ زیاتر له‌ ۱۶ میلیۆن مینی له‌کارنه‌خراوی هه‌ڵنه‌گیراوه‌و ده‌یان میلیۆن ته‌قه‌مه‌نی له‌ دوای شه‌ڕ له‌ کوردستان به‌جێ ماون، به‌ڵام که‌مترینی ئه‌وانه‌ هه‌ڵگیراونه‌ته‌وه‌. هه‌ر به‌پێی ئه‌و ئامارانه‌ له‌ ماوه‌ی ساڵانی ۱۳۶۸، واته‌ دوای کۆتایی هاتنی شه‌ڕ له‌ گه‌ڵ عێڕاق تا ساڵی ۸۹ زیاتر له‌ ۲۴۳۳ که‌س له‌ ناوچه‌ سنوورییه‌کانی ئێران به‌ هۆی ته‌قینه‌وه‌ی مین کوژراون‌و ۵۶۰۱ که‌سیش بریندار بوون. له‌وه‌نده‌ قوربانییه‌ی ته‌قینه‌وه‌ی مین له‌ ئێران کورده‌کان پشکی شێریان به‌رکه‌وتوه‌و ۱۹۶۶ که‌س له‌و کوژراوانه‌ ۴۷۱۷ که‌سیش له‌ برینداره‌کان کورد بوون‌و له‌ ناوچه‌ سنوورییه‌کانی کوردستان له‌ پارێزگاکانی ئیلام، کرماشان، سنه‌و ورمێ بوونه‌ته‌ قوربانیی ته‌قینه‌وه‌ی مین.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *