چوار کەس لە ئەندامانی ئەنجومەنی سینفیی مامۆستایانی کوردستان/ دیواندەرە، بە ناوەکانی “پەرویز ئەحسەنی، ئومید شامحەممەدی، هیوا قورەیشی و کاوە محەممەدزادە”، بە دەنگی لێژنەی بەدواداچوون بۆ سەرپێچییە ئیدارییەکانی پەروەردە و بارهێنان، بە لەسەر کار دەرکران و دوور خرانەوە مەحکووم کران.
بەپێی ئەم حوکمە؛ کاوە محەممەدزادە، ئومید شامحەممەدی و هیوا قورەیشی لەسەر کار دەرکران و پەرویز ئەحسەنی بۆ ماوەی پێنج ساڵ بۆ شاری قوروە دوور خرایەوە.
پێشتر ئومید شامحەممەدی لەلایەن لقی یەکی دادگای شۆڕشی سنە بە تۆمەتی “هەوڵدان دژی ئاسایشی نیشتمانی لە ڕێگای ئەندامێتی لە یەکێک لە حیزبە کوردییەکانی ئۆپۆزیسیۆنی حکوومەت ئێران”، بە پێنج ساڵ بەندکرانی تەعزیری حوکم درابوو و “هیوا قورەیشی، پەرویز ئەحسەنی و کاوە محەممەدزادە”ش، هەر کام و بەم تۆمەتە بە پێنج ساڵ بەندکرانی هەڵپەسێردراو حوکم درابوون.
ئەم چوار چالاکە سینفییە ڕۆژی سێشەممە ٨ی خەرمانانی ١٤٠١، دوای ٧٦ ڕۆژ دەسبەسەریی کاتی، هەر کام و بە دانانی بارمتەی یەک ملیارد و پێنجسەد ملیۆن تمەنی، لە گرتنگەی ئیتلاعاتی سنە ئازاد کران.
هێزە ئەمنییەکان بۆ ڕێگریکردن لە بەڕێوەچوونی کۆبوونەوەی ناڕەزایەتیی مامۆستایان لە ٢٥ی جۆزەردانی ١٤٠١ لەبەردەم ئیدارەی پەروەردە و بارهێنانی دیواندەرە، ئەم چوار چالاکە سینفییەی مامۆستایانیان دەسبەسەر کردبوو.
ئومید شامحەممەدی، ڕۆژی دووشەممە ٢١ی خەزەڵوەری ١٣٩٧یش لەلایەن هێزە ئەمنییەکانەوە دەسبەسەر و دوای چل ڕۆژ دەسبەسەریی کاتی، بە دانانی بارمتە ئازاد کرابوو.
دواتر ئەم چالاکە سینفییە بە تۆمەتی “هەوڵدان دژی ئاسایشی نیشتمانی”، لەلایەن لقی یەکی دادگای شۆڕشی سنە، بە ساڵێک بەندکرانی تەعزیری حوکم درابوو.
