ڕۆژی سێشەممە ٨ی خەزەڵوەری ١٤٠٣، حوکمی بڕینی چوار قامکی دەستی ڕاستی دوو برا بە ناوەکانی “مێهرداد و شەهاب تەیمووری”، خەڵکی “سەرپێڵ زەهاو” و دانیشتووی “مەلارد”، لە بەندیخانەی ورمێ جێبەجێ کرا.
ئەم دوو برا بەندکراوە، بەرەبەیانی ڕۆژی سێشەممە لە بەندی تاکەکەسییەوە بۆ یەکەی جێبەجێکردنی حوکمی بەندیخانەی ورمێ گوازرانەوە و بە ئامادەبوونی بەرپرسانی دەزگای قەزایی و بەندیخانە، بە ئامێری “گیوتین” حوکمی بڕینی قامکەکانیان جێبەجێ کرا.
لەمبارەوە سەرچاوەیەکی ئاگادار وتی: دوای جێبەجێکردنی حوکمەکە، ئەم دوو برایە بۆ تێپەڕاندنی قۆناغە دەرمانییەکان، ڕەوانەی بەشی وەرگرتنی بەندکراوانی نەخۆشخانەی خومەینیی ورمێ کراون و تا ئێستا لە مافی چاوپێکەوتن و پەیوەندیگرتن لەگەڵ بنەماڵە، بێبەرین.
حوکمی بڕینی چوار قامکی دەستی ڕاستی ئەم دوو برا بەندکراوە، مانگی خاکەلێوەی ١٣٩٩ لەلایەن دیوانی باڵای وڵات پەسەند کرابوو.
بەپێی ئەم حوکمە کە لە ٣٠ی خاکەلێوەی ١٣٩٩ لەلایەن لقی ٢٤ی دیوانی باڵای وڵات بە سەرۆکایەتیی دادوەر “محەممەد کەرەمی” و ڕاوێژکاریی “ئەحمەد سیاوەشپوور” دەرچووبوو، ئەم دوو بەندکراوە بە تۆمەتی “جارێک دزیی شایەنی سزا” بە بڕینی چوار قامکی دەستی ڕاست لە بنەوە بە شێوەیەک کە تەنیا قامکی دۆشاومژە و ناوپەلیان بمێنێتەوە، گەڕاندنەوەی سامان وەکوو خۆی و لە ئەگەری نەمانی ئەو سامانەدا، پارەی سامانە دزراوەکە ڕادەست بکەنەوە، سزا درابوون.
ئەم دوو برا بەندکراوە پێشتر لەگەڵ “ئیبراهیم خەتیبی”، لەلایەن لقی ١ی دادگای کەیفەریی یەکی تایبەت بە منداڵان و تازەلاوانی ورمێ، بە بڕینی چوار قامکی دەستی ڕاست و گەڕانەوەی سامان سزا درابوون کە حوکمی ئیبراهیم خەتیبی لە دیوانی باڵای وڵات ڕەت کرایەوە و ڕادەستی لقی هاوتەریب کرایەوە و ئیبراهیم، بە ٢٠ ساڵ بەندکرانی تەعزیری حوکم درا.
ڕێکەوتی ٢ی گەلاوێژی ١٣٩٨، دانیشتنی دادگاییکردنی ئەم سێ بەندکراوە لە لقی ١ی دادگای کەیفەریی یەکی تایبەت بە منداڵان و تازەلاوانی ورمێ بەڕێوە چوو و هەرسێکیان بە تۆمەتی “دزیکردن”، بە بڕینی قامکەکانی دەستی ڕاست حوکم دران. بە ناڕەزایەتیدەربڕینی پارێزەرە دیاریکراوەکانیان دژی ئەو سزایە، دۆسیەکە ڕەوانەی لقی ٢٤ی دیوانی باڵای وڵات کرا و لە مانگی خاکەلێوەی ساڵی ١٣٩٩دا، دیوانی باڵای وڵات لە بڕیاری کۆتاییی خۆیدا، حوکمی “ئیبراهیم خەتیبی”ی هەڵوەشاندەوە و حوکمی بڕینی قامکەکانی “مێهرداد و شەهاب تەیمووری”ی پشتڕاست کردەوە.
