/ قادر وریا
ڕۆژی٣٠ی خەزەڵوەری ئەمساڵ(٢١ی نۆڤەمبری٢٠١٩) لە هەواڵێکی چاوەڕواننەکراودا، دوو لە بەناوبانگترین و دێرینترین بەندییە سیاسییەکانی ئێران کە هەر دوویان کورد و سەر بە حیزبی دیموکرات بوون، لە بەندیخانەی کۆماری ئیسلامیی ئێران ئازاد کران. هاوڕێیان عوسمان مستەفاپوور، خەڵکی پیرانشار (پاش ٢٨ ساڵ) و محەممەد نەزەری خەڵکی سایین قەڵا(پاش ٢٥ ساڵ) دیلی و بەند کران و دیتنی ئازار و ئەشکەنجە و تەنانەت بێبەشی لە تاقە جارێک مەرەخەسی، لە زیندان ئازاد کران. بە ڕواڵەت ئازادیی ئەم دوو بەندییە سیاسیە کوردە لە چوارچێوەی ڕەزامەندیی ڕێبەری کۆماری ئیسلامی لە گەڵ داوای ئەم دوایانەی سەرۆکی دەزگای قەزایی لە بارەی عەفوی دەیان “بەندیی ئەمنیەتی”دا بووە.
دام و دەزگا قەزایی و ئەمنیەتییەکانی ڕێژیمی ئێران، دان بە بوونی “بەندیی سیاسی” لە ئێراندا نانێن و ناوبردنیان بە “بەندیی ئەمنیەتی” بەو مەبەستەیە کە هۆی گرتنی ئەوان کە سیاسییە بشارنەوە و تاوانی ئەمنیەتییان بدەنە پاڵ! جارێ مەعلووم نیە “بەندیی ئەمنییەتی”یەکانی دیکە کە هاوکات لە گەڵ کاک عوسمان مستەفا پوور و کاک محەممەد نەزەری ئازاد کراون کێن؟ هەر وەها ڕوونیش نیە لە کەنگێوە، بەندکراوانی ئەمنیەتییش، چوونەتە ڕیزی ئەو بەندییانەی کە سەرۆکی دەزگای قەزایی دەتوانێ داوای عەفوی پاشماوەی مەحکوومیەتەکەیان لە ڕێبەری کۆماری ئیسلامی بکا. ئازادکرانی ئەو دوو بەندییە سیاسییە، هەر هۆیەک و هەر “حیکمەت”ێکی لە پشت بێ، بۆ خودی بەندییەکان، بنەماڵەکانیان، حیزبەکەیان، هاوڕێ و هاوباوەڕەکانیان و ئەو خەڵکەی عوسمان و مستەفا لە پێناوی خەبات بۆ ئامانجەکانی ئەوان، باشترین سالانی تەمەنیان لە بەندیخانەدا تێپەڕ کرد، جێگای خۆشحاڵییە. هاتنەدەری ئەوان لە زیندان، بەڵگەی خۆڕاگری و لەشکان نەهاتوویی ئەوان و سەرئەنجام سەرکەوتنی باوەڕی ئازادیخوازی بە سەر زیندان و زنجیر و ئەشکەنجە دایە.
ئازادیی عوسمان مستەفا پوور و محەممەد نەزەری لە کاتێک دایە کە هەر لە ڕۆژانی ڕابردوودا، دەیان کەس لە هاوزمان و هاونەتەوەکانیان بە تاوانی هاتنە سەر شەقام و دەربڕینی ناڕەزایەتی لە ستەم و بێمافی، درانە بەر دەسڕێژی گوللەی هێزە سەرکوتکەرەکانی کۆماری ئیسلامی و شەهید و بریندار کران. سەدان کەس لە خەڵکی وەزاڵەهاتوو گیراون و هەر ئیستا لە ژێر توندترین ئەشکەنجەکان دان. ئەو دوو بەندییە سیاسییە لە مێژینەیە لە کاتێک دالە زیندان ئازاد دەکرێن کە نزیکەی ٣٠ ساڵ لە تەمەنیان تەنیا بە تاوانی ئازادیخوازی و خەبات بۆ ڕزگاریی نەتەوەکەیان، لە زیندان و بە دیلی تێپەڕ کردوە. جگە لەمەش هەر ئیستا چەندین بەندیی سیاسیی دیکەی لە مێژینەی کورد، هەر وا لە زیندان دان. بۆیە ئەگەر چی هاتنەدەری ئەوان لە زیندان جێگای خۆشحاڵییە، بەڵام تا ئەو کاتەی سەدان و هەزاران ڕۆڵەی دیکەی کوردستان هەر وا لە بەندیخانە و لە ژێر ئازار و ئەشکەنجەدان، تا کاتێک نەتەوەکەمان و نیشتمانەکەمان لە ئازادی بێبەشن و، هەر ڕۆژە و هەر جارەی بە جۆرێک لە لایەن دەسەڵاتدارانی دژ بە کورد بەرەوڕووی تاوان وسەرکوت و داپڵۆسین دەبنەوە، دەبێ هیچمان هەدا نەدەین و لە خەبات بەردەوام بین. داوای ئازادیی بەندییە سیاسییەکانی دیکە و ئازادکردنی گیراوەکانی ئەم دوایانە، هەر وەها کۆتاییهاتن بە کەشوهەوای نیزامی و سەرکوتکەرانە پێویستە ببێتە داخوازێکی گشتی، هەم کۆمەڵانی خەڵک لە ڕۆژهەڵاتی کوردستان پێی لە سەر دابگرن، هەم حیزب و ڕێکخراوە سیاسییەکان، بە ڕێگای خۆی دا کاری بۆ بکەن.
بەندییە سیاسییە خۆڕاگر و لەمێژینەکانی لە چەشنی عوسمان مستەفا پوور و محەممەد نەزەری، ئەگەر لە لایەکەوە نیشانەی زۆرداری و دژیگەلی بوونی دەسەڵاتی سەردەمەکەی خۆیانن، لە لایەکی دیکەوە بەڵگەی بەچۆک دانەهاتنی تێکۆشەرانی نەتەوەکەیان لە بەرامبەر زیندان و ئەشکەنجەدا و سەمبولی خۆراگری وخۆبەختکردن لە پێناوی ئازادی دان. بزووتنەوەی ڕزگاریخواز و شۆڕشگێڕی کوردستان شانازی بەم جۆرە ڕۆڵانەی خۆی دەکا و، چاوەڕوان و هیوادارە خەڵکی کوردستان بە پێزانینەوە ئەو قارەمانانەی خۆی بگرێتە باوەش و، پێشوازی وپشتیوانییان لێ بکا.
