چاونیوز: خەلیل مورادی تەمەن ٣٢ ساڵ، خوێندکاری دەرمانسازیی زانستی پزیشکیی کرماشان، لە گرتنگەی ئیتلاعاتی کرماشان گیانی لەدەست دا.

بە پێێ هەواڵی گەیشتوو بە چاونیوز، بە وتەی سەرچاوەیەکی ئاگادار، ئەو خوێندکارە لە ماوەی ساڵانی ڕابردوودا، بیروباوەڕی گرووپە مەزهەبییەکانی هەبووە و لە مانگی خەزەڵوەری ساڵی ٩٧، لە دەرمانسازییەکەیدا، لە شوێنی کارەکەی لە کرماشان، لەلایەن ئیتلاعاتی سپای پاسدارانەوە دەسبەسەر کراوە.

ئەو سەرچاوەیە هەروەها دەڵێت: “چەندین جار بنەماڵەی ئەو خوێندکارە بۆ ئاگاداربوون لە چارەنووسی کوڕەکەیان سەردانی ناوەندە قەزاییەکانیان کردووە، بەڵام وەڵامێکی ڕوونیان دەست نەکەوتووە”.

ئەو سەرچاوەی ئاگادارە دەڵێت: “ئیدارەی ئیتلاعاتی کرماشان، ڕۆژی پێنجشەممە ٢٩ی جۆزەردان لەگەڵ بنەماڵەی ئەو خوێندکارە پەیوەندیی گرتووە، کە بۆ ناساندن و وەگرتنەوەی تەرمی کوڕەکەیان سەردانی پزشکی دادوەری کرماشان بکەن”.

ئەو سەرچاوە ئاگادارە هەروەها ڕایگەیاند: “هەتا ئێستا هۆکاری گیان لەدەستدانی ئەو خوێندکارە لە گرتنگەی ئیتلاعات ڕوون نییە وپزیشکی دادوەریی کرماشان هۆکاری گیان لەدەستدانی ئەو خوێندکارەی ڕانەگەیاندووە.”