چاونیوز: ڕێکخراوەکانی مافی مرۆڤی ڕۆژهەڵاتی کوردستان، لە ڕاگەیەندراوێکدا گوشار بۆسەر چالاکانی سیاسی و مافی مرۆڤی لە هەرێمی کوردستان مەحکوم دەکەن و داوا لە دەزگا ئەمنیەتییەکانی حکومەتی هەرێمی کوردستان دەکەن کە، ئەمنییەتی گیانی ئەرسەلان یارئەحمەدی و ژیلا موستەئجێر لە بەرامبەر هەڕەشەکانی دەزگا ئیتلاعاتییەکانی کۆماری ئیسلامی ئێران، گەرەنتی بکەن.
لە یەکەم ڕۆژی سوێند خواردنی ئیبراهیم رەئیسی سەرۆک کۆماری نوێی ئیران، تیرۆر و هەڕەشە و تۆقاندنی چالاکانی سیاسی، کلتووری و مافی مرۆڤی دیسان پەرەی سەندووە. ڕۆژی پێنجشەممە ١٤ی گەلاوێژ، چالاکێکی سیاسی بە ناوی مووسا باباخانی لە هۆتێلێکی شاری هەولێری پایتەختی هەرێمی کوردستان، تیرۆر کرا. هاوکات لەگەڵ ئەو تیرۆرە، هێزە ئەمنییەکان، گوشار و هەڕەشە بۆ سەر چالاکانی کوردی نشتەجێی هەرێمی کوردستانیان زیاد کردووە.
لەم چوارچێوەیەشدا ڕێکخراوی مافی مرۆڤی هەنگاو لە ڕاپۆرتێکدا ڕایگەیاند: باوک و برای “ئەرسەلان یارئەحمەدی”، لە ئەندامانی دەستەی بەڕیوەبەریی ڕێکخراوی مافی مرۆڤی هەنگاو، لە لایەن هێزە ئەمنییەکانەوە بانگ کراون و لێپێچینەوەیان لێ کراوە و جیا لەوەی بەڵێننامەی نووسراویان لێ وەرگرتوون، هەڕەشەی کوشتنیشیان لە ئەرسەلان یارئەحمەدی کردووە.
بە گوێرەی ئەم ڕاپۆرتە، بەڵێننامە لە باوک و برای ئەرسەلان وەرگریراوە کە یا دەبێ ئەرسەلان ڕازی بکەن واز لە چالاکییەکانی لە بواری مافی مرۆڤ بهێنێ یا ئەوەی گیانی لە دەست دەدا.
ڕێکخراوەکانی مافی مرۆڤی کوردستان، لەگەڵ ئیدانەکردنی ئەم هەڕەشەگەلە بە تایبەت لەسەر “ئەرسەلان یارئەحمەدی” و هاوژینەکەی “ژیلا موستەئجێر”، داوا لە سەرجەم ڕێکخراوکانی مافی مرۆڤ دەکەن، سەرنجێکی تایبەت بدەنە دۆخی ئەم چالاکە ناسراوانەی بواری مافی مرۆڤ و پشتیوانییان لێ بکەن.
هەروەها داوا لە ناوەندە ئەمنییەکانی هەرێمی کوردستان دەکەین کە ئاسایشی گیانی ئەرسەلان یارئەحمەدی و ژیلا موستەئجێر لە بەرانبەر هەڕەشەکانی دامەزراوە ئەمنییەکان کۆماری ئیسلامیی ئیران، گەرەنتی بکەن.
ناوی ڕێکخراوەکان
ناوەندی مافی مرۆڤ بۆ ڕۆژهەڵاتی کوردستان
کۆمەڵەی مافی مرۆڤی کوردستان
ڕێکخراوی مافی مرۆڤی هانا
ڕێکخراوی مافی مرۆڤی هەنگاو
