چاونیوز: پەرستارێکی کورد لە گرتنگەی ئیتلاعات، پاش ئەشکەنجەی توندی جەستەیی و دەروونی، بۆ بەندیخانەی دیزڵاوای کرماشان گواسترایەوە.
بەپێی ئەو ڕاپۆرتانەی بڵاو بوونەتەوە، فواد قادری، پەرستاری تەمەن ٢٧ ساڵ، خەڵکی گوندی “سەرۆ”ـ سەر بە جوانڕۆ و کارمەندی نەخۆشخانەیەک لە سنە، پاش ئەوەی لە گرتنگەی ناوەندی ئەمنییەتیدا ئەشکەنجە و ئازاری زۆری دیت، ڕەوانەی بەندیخانەی دیزڵاوای کرماشان کراوە.
بەگوێرەی ئەم زانیارییانە، ناوبراو لە ڕێکەوتی ٣٠ی خەرمانانی ١٤٠٥ لە ڕێگەی نێوان ڕوانسەر و کامێراندا لەلایەن هێزەکانی ئیدارەی ئیتلاعاتەوە دەسبەسەر کراوە. ئەم دەسبەسەرکردنە بەبێ حوکمی قەزایی بووە. سەرچاوە ئاگادارەکان ڕایانگەیاندووە کە هێزە ئەمنییەکان دەسبەجێ پاش گرتنی ناوبراو، هێرشیان کردووەتە سەر ماڵی بنەماڵەکەی لە جوانڕۆ و پاش پشکنینی وردی شوێنەکە، کەرەستە تایبەتییەکانی، لەوانە کۆمپیوتەرەکەیان بردووە.
ڕاپۆرتەکان باس لەوە دەکەن کە ئەم پەرستارە لاوە لە ماوەی لێپرسینەوەکاندا لە گرتنگەی ئیتلاعاتدا، کەوتووەتە بەر ئەشکەنجەی قورسی جەستەیی و دەروونی، کە بووەتە هۆی شکانی چەند پەراسووی. سەرەڕای ئەم برینانە، بەرپرسانی ئەمنی تا ئێستا ڕێگرییان لە پێشکەشکردنی خزمەتگوزاریی پزیشکی و گواستنەوەی بۆ ناوەندەکانی دەرمانی کردووە.
فواد قادری بۆ بەندیخانەی دیزڵاوای کرماشان گوازراوەتەوە، بەڵام تا کاتی ئامادەکردنی ئەم هەواڵە، هێشتا لە مافی دەستڕاگەیشتن بە پارێزەر، پەیوەندی بە بنەماڵەوە یان چاوپێکەوتن لەگەڵیان بێبەش کراوە.
ڕێکخراوەکانی مافی مرۆڤ و کەسوکاری ئەم هاووڵاتییە، نیگەرانیی خۆیان دەربڕیوە کە سەرەڕای تێپەڕبوونی دەسبەسەرکردنی، هێشتا تۆمەتەکان و هۆکاری گرتنی ئەم پەرستارە لەلایەن دەزگا دادوەری و ئەمنییەکانەوە ڕانەگەیەندراوە. نەبوونی وڵامی ڕوون و بێبەشبوون لە خزمەتگوزاریی دەرمانی، نیگەرانییەکانی سەبارەت بە تەندروستیی جەستەیی و ڕەوتی دۆسیەکەی زیاتر کردووە.
