به‌ندیخانه‌ی دیزل‌ئاوای كرماشان له بواره‌كانی هه‌ڵسوكه‌وتی خراپی کاربه‌ده‌ستان، لێدان‌و كوتانی به‌ندکراوان له لایه‌ن به‌رپرسانی زیندان، خراپی‌و كه‌میی خواردن، ڕه‌چاونه‌كردنی بێهداشت‌و پاك‌و خاوێنی و پێڕانه‌گه‌یشتنی پزیشكی له بارودۆخێكی یه‌كجار خراپ دایه.
به‌پێی ڕاپۆرتی كۆمه‌ڵه‌ی چالاكانی مافی مرۆڤ له ئێران، ئه‌گه‌رچی ئاماری ڕه‌سمی له ژماره‌ی وردی به‌ندكراوانی زیندانی دیزل‌ئاوای كرماشان له‌به‌ر ده‌ست‌دا نییه، به‌ڵام به قسه‌ی به‌ندكراوانی ئه‌م زیندانه، حه‌شیمه‌تی ئه‌م زیندانه نزیك به 6 هه‌زار كه‌س مه‌زنده كراوه كه چه‌ند به‌رابه‌ری ستانداری خۆی به‌ندییان تێ‌خزاندوه.
یه‌كێك له به‌ندكراوانی زیندانی دیزل‌ئاوای كرماشان وێڕای پشتڕاستكردنه‌وه‌ی ئه‌م بابه‌تانه گوتی ئه‌و خواردنه له‌و به‌ندیخانه‌یه ده‌درێ به به‌ندییه‌کان یه‌كجار خراپه. خواردنه‌که كه‌مه‌و ئه‌گه‌ر به‌ندكراوێك ملاقاتی نه‌یه تووشی به‌دخۆراکی‌و كه‌میی ویتامینه‌كان ده‌بێ.
به‌ندكراوێكی دیكه‌ی ئه‌م به‌ندیخانه‌ی كه به ده‌ست نه‌خۆشیی پێسته‌وه ده‌ناڵێنێ له‌باره‌ی بارودۆخی بێهداشت‌و پێڕاگه‌یشتنی پزیشكی وه‌بیری هێنایه‌وه كه زۆرینه‌ی به‌ندكراوان نه‌خۆش و به‌ده‌ست ئه‌سپێ‌وه خوراون. نه‌خۆشیی پێست زۆربه‌یان گرتویانه‌و ئه‌گه‌ر شانسیان هه‌بێ مانگێ جارێك نۆره‌ی دوكتوریان به‌رده‌كه‌وێ‌و ئه‌ویش به پێدانی چه‌ند حه‌بی ساده‌ی ده‌یاننێرنه‌وه به‌ند.
له لایه‌كی دیكه‌وه به‌ندكراوێكی دیكه به ڕاپۆرتنێری هێرانای ڕاگه‌یاندوه كه لێدان‌و كوتانی به‌ندییه‌کان له‌و زیندانه ڕمێنی هه‌یه‌و وه‌ك ئاژه‌ڵ‌و حه‌یوان هه‌ڵسوكه‌وتمان له‌گه‌ڵ ده‌كه‌ن. هه‌ر جارێ به بیانوویه‌ك له لایه‌ن كاربه‌ده‌ستان‌و مه‌ئمورانی ئه‌م زیندانه هه‌ڕامان ده‌كه‌نێ‌و لێمان ده‌ده‌ن.
ئه‌م به‌ندكراوه وێڕای نیگه‌رانی ده‌ربڕین له ناڕوونیی چاره‌نووسی زیندانییه‌كان‌و داواكاریی ناڕه‌وای زیندانه‌وانه‌کان له بنه‌ماڵه‌ی به‌ندكراوان گوتی، كۆمه‌ڵێك به‌ندكراو ماوه‌ی 2 بۆ 3 ساڵ ده‌بێ لێره‌ن‌و هیچ حوكمێكیشیان بۆ نه‌بڕاوه‌ته‌وه‌و چاره‌نووسیان ناڕوونه. هێندێك له كادری به‌ندیخانه داوای به‌رتیل‌و ته‌نانهت داوای ناڕه‌وا له بنه‌ماڵه‌ی به‌ندكراوان ده‌كه‌ن. بۆ نموونه ئه‌گه‌ر بنه‌ماڵه‌یه‌ك بیهه‌وێ جلوبه‌رگ بنێرێته نێو زیندان ده‌بێ به‌رتیل بدا‌و یان چاوه‌ڕوانی داوای ناڕه‌وا له لایه‌ن كاربه‌ده‌ستانی زیندانه‌وه بێ.
