بەرەبەیانی یەکشەممە ١٦ی خەرمانان، حوکمی سێدارەی پێنج بەندکراو بە ناوەکانی “هۆشەنگ هەنارە” خەڵکی گوندی “خلیان”، “نەجیب ئازەرم” و “بابەک عومەرزادە” خەڵکی گوندی “گونبەد”، “تۆفیق نیعمەتی” خەڵکی گوندی “بردیزی”، هەر چواریان سەر بە ناوچەی سۆما و برادۆستی ورمێ و “کەیوان مامەدی” خەڵکی گوندی “دریک” سەر بە شاری سەڵماس، لە بەندیخانەی ناوەندیی تەورێز جێبەجێ کرا.
لەوبارەوە سەرچاوەیەکی ئاگادار گوتی: ئەم پێنج بەندکراوە بە تۆمەتەکانی پەیوەندیدار بە مادەی هۆشبەرەوە بە سێدارە حوکم درابوون و پێشتر لە بەندیخانەی هەشتڕوود بەند بوون و ماوەیەک پێش بۆ جێبەجێکرانی حوکمەکانیان ڕەوانەی بەندیخانەی ناوەندیی تەورێز کرابوون.
ئەم پێنج بەندکراوە بەبێ هەبوونی مافی دوایین چاوپێکەوتن لەگەڵ بنەماڵەکانیان و بە شێوەی نهێنی لەسێدارە دراون.
تا ئێستا هەواڵی لەسێدارەدانی ئەم پێنج بەندکراوە لە میدیا حکومەتییەکان، بەتایبەتی میدیاکانی سەر بە دەزگای داد، ڕانەگەیەندراوە.
