لە ماوەی چەند ڕۆژی ڕابردوودا، یەکێک لە ئەندامانی بنەماڵە دادخوازەکانی خەڵکی مهاباد بە ناوی “وەهاب خەدیری‌پوور”، لەلایەن دادگای شۆڕشی ئەم شارەوە بە ١٠ مانگ بەندی تەعزیری حوکم دراوە.
لەمبارەوە سەرچاوەیەکی ئاگادار بە چاونیوزی گوت: دادگای شۆڕش ئەم هاونیشتمانییەی بە “هاوکاری لەگەڵ حیزبی دێموکراتی کوردستانی ئێران” تۆمەتبار کردووە.
کاک وەهاب ڕێکەوتی ١ی ڕەشەمەی ساڵی ڕابردوو، دوای سێ هەفتە دەسبەسەربوون، بە دانانی بارمتەی ٥٠٠ ملیۆن تمەنی بە شێوەی کاتی و تا کۆتاییهاتنی قۆناغەکانی دادگاییکردن لە بەندیخانەی ناوەندیی مەهاباد، ئازاد کرابوو.
شایانی باسە کە سۆهراب خەدیری‌پوور برای وەهابە کە بەهاری ١٤٠٠ لەلایەن هێزەکانی سپای پاسدارانەوە گیانی لێ ئەستێندرا. هەروەها ناوبراو ئامۆزای شەماڵ خەدیری‌پوور لە گیانبەختکردووانی بزووتنەوەی ژن ژیان ئازادی لە مهابادە کە ڕێکەوتی ٣ی خەزەڵوەری ١٤٠١ بە تەقەی ڕاستەوخۆی هێزەکانی حکوومەت گیانی لەدەست دا.
