چاونیوز: ڕۆژی هەینی ١٤ی سەرماوەزی ١٣٩٩، بەرپرسانی بەندیخانەی ورمێ لە چاوپێکەوتنی پشکێنەری ڕێکخراوی زیندانەکان لە بەندی سیاسی ئەو بەندیخانەیە بە هێنانەوەی پاساوی جۆراوجۆر و نهێنیکاری و خولقاندنی کیشە و گرفتی جۆراوجۆر نەیانهێشت پشکێنەر بە تەواوەتی کارەکەی خۆی تەواو بکات. لەو پشکنینەدا بەرپرسانی بەندیخانە خەوتنگەی ١-٢ی بەندیخانەی ورمێ وەک بەندی سیاسی بە پشکێنەر ناساندبوو.
بەپێی هەواڵی چاونیوز بە گێرانەوە لە هێرانا، لەوماوەیەدا ئاکار و ڕەوشتی دادستێن بە تەواوەتی گۆڕابوو و زۆر بە ڕێزەوە دەگەڵ زیندانییەکان هەڵسووکەوتی دەکرد!.
ئەو سەرچاوەیە ڕایگەیاندووە، بەیانی ڕۆژی هەینی پشکێنەری رێکخراوی زیندانەکان کە لە تارانەوە چووبووە ورمێ لەکاتی پشکنینی بەندیخانەی ناوەندی ورمێ چاوی بە تابڵۆی خەوتنگەی “هدایت” دەکەوێ و داوا لە بەرپرسانی بەندیخانە دەکات کە ئەو ژوورەی پێشان بدەن. کاتێک کە دەچتە ئەو بەندە و لە بەندییەکان دەپرسێ ئێوە تاوانتان چییە، بۆی دەردەکەوێت بەرپرسانی بەندیخانە درۆیان پێ گوتووە و بەندەکانی ١-٢ و کە پێشتر چاوی لێکردبوو هی زیندانیانی سیاسی نەبووە و هەڵیانخەڵەتاندووە.
دوای ئەم ڕووداوە، پشکێنەر سەرجەم بەرپرسانی بەندیخانە و چاودێرەکانی دیکە وەدەر دەنێت و دەگەڵ زیندانییەکان دەدوێ، ئەو خۆی بە “فەراهانی” پشکێنەری ڕێکخراوی زیندانەکانی ئێران دەناسێنێت و پێیان دەڵێ بۆ چارەسەری کێشەی قەزایی، ئاسایش و ئاکاری ئێوە هاتوومە، هەر کێشە و گرفتێکی هەتانە پێم بڵێن. بەڵام دوای ٥ خولەک و سەردانی خێراخێرای بەرپرسانی زیندان بۆ تێکدانی ئەو چاوپێکەوتنە، بە فەراهانی دەڵێن کە، پێوەندیان دەگەڵ بەندیخانە گرتووە و جەنابت دەبێ هەرچی زووتر بە فرۆکە بگەڕێیەوە، بەکورتی و بە کوردی کارەکەیان دیزە بە دەرخۆنە کرد و پێچایانەوە.
سەرچاوەکە ئەوەشی گوت کە، دوای ئەوەیکە زیندانییەکان باسیان لە دانانی ئامێری پاڕازیت کرد، پشکێنەرەکە دانی بە قسەکانی ئەوان دانان و بەڵێنی ئەوەی داوە کە ئەو کێشەیە لە تاران باس بکا و چارەسەری بۆ بدۆزنەوە.
