چاونیوز: ناسنامەی هاووڵاتییەکی دیکەی کورد، کە لە کاتی دوایین ناڕەزایەتییەکان لە تاراندا گیانی لەدەست داوە، ئاشکرا کرا.
بە پێی ڕاپۆرتە بڵاوکراوەکان، ڕێکەوتی ١٩ی بەفرانباری ١٤٠٤، “محەممەد بەهمەنی”، تەمەن ٢٤ ساڵ، خەڵکی شاری سنە، دوای ئەوەی لە ناوچەی یافت‌ئاباد، لە کاتی ناڕەزایەتییە سەرتاسەرییەکانی تاران بە بەرکەوتنی دوو گولـلە گیانی لەدەست دا.
بە گوێرەی سەرچاوە ئاگادارەکان، دوای زیاتر لە مانگێک، بنەماڵەکەی هێشتا ئاگاداری شوێنی ناشتنی تەرمەکەی نین و هەرگیز ڕێگەیان پێ نەدراوە تەرمەکە ببینن و وەری بگرن.
هەواڵی گیانلەدەستدانی تەنیا لە ڕێگەی تەلەفۆنەوە بە بنەماڵەکەی ڕاگەیەندرا و بەس خزمێکی توانی لە پزیشکی یاسایی کەهریزەک تەرمەکەی بناسێتەوە.
ناوەندەکانی ئیتلاعاتی ڕێژیمی ئێران، داوای بڕە پارەیەکی زۆریان کردووە بۆ گەڕاندنەوەی تەرمەکە، بڕە پارەیەک کە بنەماڵەکەی بەهۆی کێشەی داراییەوە نەیانتوانی بیدەن بەم بۆنەوە تەرمی “محەممەد بەهمەنی” بە نهێنی لە شوێنێکی نادیار بەبێ ئاگاداری بنەماڵەکەی بە خاک سپێردراوە.
شایانی باسە، محەممەد بەهمەنی، پێشتر بە تۆمەتی بەشداریکردن لە ناڕەزایەتی و چالاکییە سیاسییەکان، لەوانە لە کاتی ڕاپەڕینی “ژن، ژیان، ئازادی” دەسبەسەر و لە پێوەندی لەگەڵ ناڕەزایەتییەکانی شاری سنە لەلایەن ناوەندە ئیتلاعاتییەکانەوە لێپێچینەوەی لێ کراوە.
