مامۆستا “ئایەت غوڵامی”، لەلایەن دادگای تایبەتی ڕووحانییەتی هەمەدان، بە تۆمەتگەلی “تەبلیغ دژی نیزام”، “بڵاوکردنەوە درۆ”، “شێواندنی بیروڕای گشتی” و “بێڕێزیکردن بە فاتمەی زەهرا”، بە دوو ساڵ بەندکرانی تەعزیری کە ساڵێکی جێبەجێ دەکرێت، حوکم درا.
ئەم حوکمە ڕۆژی شەممە ٣ی جۆزەردان بە ناوبراو ڕاگەیەندرا و ٢٠ ڕۆژ کاتی ناڕەزایەتیدەربڕینی هەیە.
ئەم مامۆستا کوردە پێشتر لە ڕێکەوتی ٣ی بانەمەڕی ئەمساڵ، بانگی دادگای تایبەتی ڕووحانییەتی کرماشان و دەسبەسەر کرابوو و ڕێکەوتی ٦ی بانەمەڕ بە دانانی بارمتەی ٧٠٠ ملیۆن تمەنی بە شێوە،ی کاتی تا کۆتاییهاتنی قۆناغەکانی دادگاییکردن، ئازاد کرابوو.
مامۆستا ئایەت ڕێکەوتی ١٩ی پووشپەڕی ١٤٠٣، دوای بانگکردن بۆ بەشی حەراسەتی ناوەندی ڕووحانییەتی کرماشان، بە فەرمانی ئەم ناوەندە ئەمنییە، لە مامۆستایەتیی جەماعەت و چالاکی لە مزگەوت، دوور خرابووەوە.
کەمێک دوای قەدەغەکردنی چالاکییەکانی، ئەم مامۆستایە لە ڤیدیۆیەکدا وێڕای ناڕەزایەتی بە وەها حوکمێک، جەختی کردەوە کە پێشتر هۆشدارییان پێ داوە کە دەبێ هەموو کلاسەکان و دانیشتنەکانی مزگەوتی “محەممەدولمستەفا” لەژێر چاوەدێری و لەلایەن وانەبێژە دیاریکراوەکانی ناوەندە ئەمنییەکانەوە بەڕێوە بچن.
مامۆستا ئایەت غوڵامی، هۆکاری قەدەغەکردنی چالاکییەکانی خۆی گەڕاندووەتەوە بۆ ناڕەزایەتیدەربڕین لەمەڕ کوشتنی کۆڵبەران و سوختبەران، ڕەخنەگرتن لە دەسەڵات، واژۆی بەیاننامەی ئیدانەکردنی لەسێدارەدانی مامۆستا محەممەد خزرنژاد و دەسبەسەرکردنی مامۆستایان.
