بەرەبەیانی چوارشەممە ٢ی ڕەزبەری ١٤٠٤، حوکمی لەسێدارەدانی دوو زیندانی بە ناوەکانی “فەرشاد گراوەند” و “ئەحمەدرەزا گراوەند”، خەڵکی کۆیەشت، لە زیندانی قزلحەساری کەرەج جێبەجێ کرا.
ئەم دوو زیندانییە ٧ ساڵ پێش ئێستا بە تۆمەتەکانی پەیوەندیدار بە “ماددە هۆشبەرەکان” دەسبەسەر کرابوون و پاشان سزای لەسێدارەدانیان بەسەردا سەپێنرابوو.
ئەم دوو زیندانییە ڕۆژی سێشەممە یەکەمی ڕەزبەر، بۆ جێبەجێکردنی حوکمەکەیان گوازرابوونەوە بۆ ژووری تاکەکەسیی زیندانی قزلحەسار.
هەروەها ڕۆژی یەکشەممە ٣٠ی خەرمانان، حوکمی لەسێدارەدانی دوو زیندانی بە ناوەکانی “هادی نوروزی” و “کازم جامەشۆرانی” خەڵکی کرماشان، لە زیندانی ناوەندی ئەم شارستانە (دیزڵاوا) جێبەجێ کراوە.
کازم جامەشۆرانی، تەمەن ٢٧ ساڵ و هادی نوروزی، تەمەن ٢٨ ساڵ، بە ڕیز، نزیکەی ١٧ مانگ و ٥ ساڵ پێش ئێستا بە تۆمەتی “کوشتنی بەئەنقەست” دەستگیرکرابوون و سزای لەسێدارەدانیان بەسەردا سەپێنرابوو.
