شەهاب دارابی، شۆفێری بارهەڵگری خەڵکی شاباد، کە لە ڕەوتی پشتیوانیکردن لە شۆفێرانی بارهەڵگر دەسبەسەر کرابوو، بە ٣ ساڵ و یەک ڕۆژ بەندکران، حوکم درا.
بەپێی حوکمی دەرکراو لەلایەن یەکێک لە لقەکانی دادگای شۆڕش کە تازەیی بە شەهاب دارابی ڕاگەیەندراوە، ناوبراو بە ٣ ساڵ و یەک ڕۆژ بەندکرانی تەعزیری حوکم دراوە. ئەم حوکمە لە پەیوەندی لەگەڵ پێوەستبوونی بە مانگرتنی شۆفێرانی بارهەڵگر و هەروەها بڵاوکردنەوەی پۆست لە تۆڕە کۆمەڵایەتییەکان بۆ پشتیوانی لە مانگرتنەکان، دەرکراوە.
شەهاب دارابی ناسراو بە “یووزی ئاسیا”، لە ڕەوتی پێوەستبوونی بە مانگرتنەکانی ئەم دواییەی شۆفێرانی بارهەڵگر لە شارەکانی کوردستان و ئێران، ڕێکەوتی ٦ی جۆزەردان بە شێوەیەکی توندوتیژ و بە لێدان لەلایەن هێزەکانی ئیدارەی ئیتلاعاتەوە دەسبەسەر کرا.
دوای دەسبەسەرکردنی ئەم شۆفێرە، ڤیدیۆیەکی لێ بڵاو کرایەوە؛ لەم ڤێدیۆیەدا کە ڕوون نییە لە چ دۆخێکدا تۆمار کراوە، ناوبراو لەمەڕ هەوڵەکانی پێشووی خۆی پەشیمانی دەردەبڕێت. ئەم ڤیدیۆیە کاردانەوەی بەربڵاوی لێکەوتەوە و ژمارەیەک لە بەکارهێنەران ئەمەیان بە “دانپێدانانی زۆرەملێ” وەسف کرد.
شەهاب دارابی لە کۆتاییدا ڕێکەوتی ١٢ی جۆزەردان، بە دانانی بارمتە، بە شێوەی کاتی لە بەندیخانە ئازاد کرا.
