ڕۆژی سێشەممە ٢٣ی ڕێبەندانی ١٤٠٣، هاونیشتمانییەکی خەڵکی پیرانشار بە ناوی “سوعدا خەدیرزادە”، بۆ یەکەمجار دوای ٤١ مانگ بەندکران، بە دانانی بارمتەی دوو ملیارد و پێنجسەد ملیۆن تمەنی، وێڕای سۆلینا ئیسماعیلی منداڵە ٢ ساڵ و ٨ مانگەکەی کە لە بەندیخانەدا لەدایک بووە، بۆ ماوەی ٢٠ ڕۆژ مرەخەسیی پێدرا.
ئەم هاونیشتمانییە کە ڕێکەوتی ٢٢ی ڕەزبەری ١٤٠٠، لەلایەن هێزە ئەمنییەکانەوە بەبێ حوکمی دادوەر دەسبەسەر و ڕەوانەی گرتنگەیەکی ئەمنیی ورمێ کرابوو، دوای نزیکەی ١١ مانگ دەسبەسەرکران، لێپرسینەوە و ئەشکەنجەی دەروونی، لەلایەن لقی سێی دادگای کەیفەریی یەکی مەهاباد بە تۆمەتگەلی “بەشداری لە کوشتن (کەسێک بە ناوی خدر پیرۆتی لە ئەندامانی سپای پاسداران)”، “ڕزگارکردنی تۆمەتباری سەرەکی” و “ئەندامێتی لە حیزبی دێموکراتی کوردستانی ئێران”، بە ١٢ ساڵ و ٦ مانگ بەندی تەعزیری حوکم درابوو.
دانیشتنی دادگای ناوبراو بە شێوەی ئانلاین، ڕێکەوتی ٢ی خەرمانان بەڕێوە چوو و دەرکردنی ئەم حوکمە، ئەمڕۆ بە بنەماڵەکەی ڕاگەیەندرا.
ئەم بەندکراوە سیاسییە، ڕێکەوتی ٢٧ی گەلاوێژ، لە ناڕەزایەتی لەهەمبەر ناڕوونیی چارەنووسی و گوشاری ناوەندە ئەمنییەکان، لە بەندی ژنانی بەندیخانەی ناوەندیی ورمێ، بە هەڵواسینی خۆی ویستبووی خۆی بکوژێت.
سۆعدا خەدیرزادە ڕێکەوتی ٣٠ی جۆزەردانی ١٤٠١، دوای نەشتەرگەریی سزارییەن و لەدایکبوونی کۆرپەکەی (سۆلینا ئیسماعیلی)، بەبێ تێپەڕاندنی ڕەوتی دەرمانکردن، گەڕێندرایەوە بۆ بەندی ژنانی بەندیخانەی ناوەندیی ورمێ. مەئموورانی بەندیخانە لە کاتی بەستەریبوونی سۆعدا لە نەخۆشخانە، دەست و لاقی ناوبراویان بە تەختەکەیەوە بەستبووەوە کە ناڕەزایەتیی کادری دەرمانیی لێکەوتبووەوە.
ئەم هاونیشتمانییە، بانەمەڕی ئەمساڵ لە ناڕەزایەتی لەهەمبەر درێژەی دۆخی ناڕوونیی چارەنووسی لە بەندیخانەی ورمێ، بۆ ماوەی ١١ ڕۆژ مانی لە خواردن گرت. سۆعدا لەسەر بەڵێنیی یارمەتیی بەرپرسانی بەندیخانە لەمەڕ ئازادیی کاتیی ئەو بە دانانی بارمتە، مانگرتنەکەی شکاند، بەڵام بەهۆی دژایەتیی ئیتلاعاتی سیاسی، بڕیاری ئازادیی کاتیی ناوبراو هەڵوەشێندرایەوە.
سۆعدا تووشی نەخۆشییەکانی “گورچیلە، دڵ و پشت ئێشە” بووە و لەم ماوەیەدا لە چاوەدێریی پزیشکیی تایبەت بێبەری کراوە.
“سولینا ئیسماعیلی” کە ٢ ساڵ و ٨ مانگ پێش لە بەندیخانە لەدایک بوو، بە فەرمانی ناوەندە ئەمنییەکان هەتا ئێستا لە مافی هەبوونی ناسنامە بێبەرییە.
