لە ماوەی ڕۆژانی ڕابردوودا، لقی ١٥ی دادگای شۆڕشی تاران بە سەرۆکایەتیی دادوەر “ئەبوولقاسم سەڵەواتی”، وریشە مورادی، بەندکراوی سیاسیی کوردی بەندکراو لە بەندیخانەی ئێڤینی بە تۆمەتی “بەغی” بە سێدارە سزا دا.
یەکەمین دانیشتنی دادگاییکردنی وریشە مورادی ڕێکەوتی ٢٧ی جۆزەردانی ١٤٠٣ لە لقی ١٥ی دادگای شۆڕشی تاران و دووەمین دانیشتنی دادگاییکردنەکەی ڕێکەوتی ١٤ی ڕەزبەر لە هەمان لق بەڕێوە چوو.
پەخشان عەزیزی و وریشە مورادی، ڕەزبەری ئەمساڵ، لەگەڵ سێ بەندکراوی سیاسیی تر بە ناوەکانی “مەحبووبە ڕەزایی، نەرگس محەممەدی و پەریوش موسلیمی”، بەندکراوانی بەندیخانەی ئێڤین، لە دۆسیەیەکی هاوبەشدا کە لەم دواییانەدا بە دژیان کراوەتەوە، سەرجەم بە ٢٧ مانگ و ڕۆژێک بەند سزا دران.
بەپێی حوکمێک کە لەلایەن دادگای کەیفەریی دووی موجتەمەعی دادی قودسی تاران بە سەرۆکایەتیی دادوەر “ئەبوولفەزل عامری” دەرکرا و ڕۆژی شەممە ٢٨ی ڕەزبەری ١٤٠٣ بەم بەندکراوانە ڕاگەیەندرا، پەخشان عەزیزی، وریشە مورادی، مەحبووبە ڕەزایی و نەرگس محەممەدی بە تۆمەتی “شەڕ و تێکهەڵچوون دەگەڵ مەحمورانی بەندیخانە و سەرکێشی، هەر کامیان بە ٦ مانگ بەند و پەریوەش موسلیمی بە ٣ مانگ و ڕۆژێک بەندکران سزا دران. لەم دۆسیەیەدا پەریوەش لە تۆمەتی “تێکدانی نەزمی بەندیخانە” و تۆمەتبارانی دیکە لە تۆمەتی “شکاندنی کەلوپەل”، بێتاوان ناسران.
کردنەوەی ئەم دۆسیەیە پەیوەندیدارە بە ڕێکەوتی ١٦ی گەلاوێژی ١٤٠٣. لەم ڕێکەوتەدا بەندکراوانی بەندی ژنانی ئێڤین دوای ئاگاداربوون لە حوکمی سێدارەی ڕەزا ڕەسایی، ناڕازیی کوردی یارسان، لەنێو بەندیخانەدا ناڕەزایەتییان دەربڕی کە بووە هۆی دەرگیریی گاردی بەندیخانە لەگەڵ ئەم بەندکراوانە و بە دژیان دۆسیە ساز کرا.
وریشە مورادی (جوانا سنە)، لە چالاکانی ژنی کورد، ڕۆژی سێشەممە ١٠ی گەلاوێژی ١٤٠٢، لە سنە لەلایەن هێزە ئەمنییەکانەوە دەسبەسەر کرا.
وریشە مورادی، ئەندامی کۆمەڵگەی ژنانی ئازادی ڕۆژهەڵاتی کوردستان بووە و ئەم ڕێکخراوە ڕۆژی سێشەممە ٤ی ڕەزبەری ١٤٠٢، بە بڵاوکردنەوەی ڕاگەیەندراوێک ڕوو لە بیروڕای گشتی و ڕیپۆرتەری تایبەتی مافی مرۆڤی ڕێکخراوی نەتەوە یەکگرتووەکان لە کاروباری ئێران و ڕێکخراوە نێونەتەوەییەکانی پارێزەری مافی مرۆڤ، ڕایگەیاند کە وریشە مورادی، بە مەبەستی “چالاکیی سیاسی و ڕێکخستنی ژنان” لە کوردستان بووە.
وریشە مورادی پاش دەسبەسەرکران، ڕەوانەی گرتنگەی ئیتلاعاتی سنە کرابوو و پاش دوو هەفتە لێپرسینەوە بە مەبەستی وەرگرتنی دانپێدانانی زۆرەملێ، کۆتاییەکانی مانگی گەلاوێژی ١٤٠٢، ڕەوانەی بەندی ٢٠٩ی بەندیخانەی ئێڤین کرابوو. ئەم چالاکە دوای پێنج مانگ مانەوە لە بەندی تاکەکەسی، ڕێکەوتی ٥ی بەفرانباری ١٤٠٢، ڕەوانەی بەندی ژنانی بەندیخانەی ئێڤین کرا.
