لاپەڕەی ئینیستاگرامی ئەحمەدڕەزا حائێری، بەندکراوی سیاسیی بەندکراو لە بەندیخانەی قزەڵحیسار هەواڵی داوە؛ ناوەندە ئەمنییەکانی کۆماری ئیسلامی لە هەوڵێکی نوێدا، ئەم بەندکراو و چالاکی مافی مرۆڤە کوردەی بە تۆمەتی “تەبلیغ دژی نیزام”، بانگی لقی ١٣ی دادسەرای گشتی و شۆڕشی کەرەج کردووە. ئەم بانگ‌کردنه تەنیا دە ڕۆژ دوای ڕووداوی “شەممەی خوێناویی قزەڵحیسار” لە ٤ی گەلاوێژی ئەمساڵ و دوای گەڕانەوەی حائێری بۆ بەندی گشتی، پێی ڕاگەیەندراوە.
سەرچاوە نزیکەکان لە بنەماڵەی حائێری ڕایانگەیاند؛ ئەم بەندکراوە سیاسییە، بەهۆی دۆخی جەستەیی و ڕۆحی، لەبەر لێدان و ئەشکەنجەکردن لە ڕەوتی سەرکوتی بەندکراوانی سیاسی لە شەممەی خوێناویی قزەڵحیسار، ئازاری دەدی و لە ماوەی ڕۆژانی ڕابردوودا لانیکەم سێ جار بۆ دەرمان ڕەوانەی ناوەندی دەرمانیی یەکەی چواری بەندیخانە کراوە.
بە گوتەی ئەم سەرچاوەیە، نیگەرانیی بەرپرسان لە ئاشکراکردنی وردی حائێری لەبارەی وردەکاریی ئەم ڕووداوە و ئەشکەنجەکان، مەبەستی سەرەکیی ئەم دۆسیەسازییە نوێیەیە.
حائێری لە پەیوەندییەکی تەلەفۆنیدا گوتبووی: ڕێژەی بەرفراوانی و قوڵیی تاوانەکان و پێشێلکردنی مافی مرۆڤ لە شەممەی خوێناویی قەزەڵحیسار، لە ٣٧ ساڵی ڕابردوودا بێ وێنە بووە.
شایانی باسە کە: ئەحمەدڕەزا حائێری، برای سەجاد حائێری، بەندکراوی سیاسییە کە ڕێکەوتی ٢٠ی بانەمەڕی ١٤٠٢، بۆ تێپەڕاندنی حوکمی بەندکرانەکەی، ڕەوانەی بەندی گشتیی بەندیخانەی قەزەڵحیسار کرا و ماوەی حوکمی خۆی تێدەپەڕێنێت.
