بڕیاری دەسبەسەرکرانی خزر (شەماڵ)ڕەسووڵمروەت، چالاکی مەدەنی و زیندانیی سیاسیی پێشوو، کە لە ڕۆژانی ڕابردوودا لە گرتنگەی ئیدارەی ئیتلاعاتی ورمێ ڕا بۆ زیندانی مەهاباد گوازرابۆوە جارێکی دیکە درێژ کرایەوە.
بەپێی ڕاپۆرتی گەیستوو بە ناوەندی مافی مرۆڤ بۆ ڕۆژهەڵاتی کوردستان، لقی یەکی لێکۆڵینەوەی دادسەرای گشتی و ئینقلابی مەهاباد بڕیاری دەسبەسەربوونیی ناوبراوی بۆ ماوەی مانگێکی دیکە درێژ کردووەتەوە.
خزر ڕەسووڵمروەت، کاتژمێر ٢ی بەرەبەیانی ڕۆژی ٧ی خەزەڵوەری ١٤٠٤، بە هێرشی زیاتر لە ٢٠ کەس لە هێزه چەکدارەکانی وەزارەتی ئیتلاعات بۆ سەر ماڵەکەی لە مەهاباد و بەبێ نیشاندانی هیچ بەڵگەیەکی قەزایی، دەسبەسەر کرا.
ناوبراو سەرەتا بۆ گرتنگەی ئیدارەی ئیتلاعاتی ورمێ گوازرایەوە و بۆ ماوەی ١٧ ڕۆژ بەهۆی چالاکییەکانی لە تۆڕە کۆمەڵایەتییەکان و پێوەندیی لەگەڵ زیندانییانی سیاسیی پێشوودا، لێکۆڵینەوەی لەگەڵ کرا.
ئەم چالاکە مەدەنییە وەک ناڕەزایەتییەک بەرانبەر بە دەسبەسەرکردنەکەی، بۆ ماوەی پێنج ڕۆژ مانی لە خواردن گرت و لە کۆتاییدا بۆ زیندانی مەهاباد گوازرایەوە.
تۆمەتە ڕاگەیەندراوەکانی دژی ناوبراو بریتین لە «چالاکیی پڕوپاگەندەیی دژی نیزام» لە تۆڕە کۆمەڵایەتییەکان و «هەنگاونان دژی ئاسایشی نەتەوەیی» و دۆسیەکەی لە قۆناغی دەرکردنی کەیفەرخواستدایە.
خزر ڕەسووڵمروەت پێشتر لە ڕێکەوتی ٨ی ڕەشەممەی ١٣٩١، بەهۆی بەشداریکردن لە کۆبوونەوەی پشتیوانی لە قوتابییانی «شیناوێ»ی، پیرانشار لە بەردەم ئیدارەی پەروەردە و بارهێنانی مەهاباد دەسبەسەر کرا و بۆ ماوەی سێ مانگ لە گرتنگەکانی ئیدارەی ئیتلاعاتی مەهاباد و ورمێ لێکۆڵینەوەی لەگەڵ کرا.
ناوبراو لە مانگی ڕەزبەری ١٣٩٢، بەبێ مافی هەبوونی پارێزەری دیاریکراو، بە تۆمەتی «هەنگاونان دژی ئاسایشی نەتەوەیی» لەلایەن لقی یەکی دادگای ئینقلابی ئیسلامیی مەهاباد بە سەرۆکایەتیی دادوەر جەوادیکیا، سزای ۵ ساڵ بەندکرانی تەعزیریی بەسەردا سەپێنرا.
ئەم سزایە لە مانگی سەرماوەزی هەمان ساڵ لەلایەن دادگای پێداچوونەوە پشتڕاست کرایەوە و ناوبراو پاش کۆتاییهاتنی ماوەی سزاکەی، لە زیندانی میاندواو ئازاد کرا.
