ڕۆژی چوارشەممە ١٩ی بەفرانباری ١٤٠٣، حوکمی سێدارەی پەخشان عەزیزی، یاریدەدەری کۆمەڵایەتیی خەڵکی مهاباد، لەلایەن لقی ٣٩ی دیوانی باڵای وڵات پشتڕاست کرایەوە.
ئەمیر ڕەئیسییان، پارێزەری ئەم بەندکراوە سیاسییە بە پشتڕاستکردنەوەی ئەم هەواڵە ڕایگەیاند: لقی ٣٩ی دیوانی باڵا، بەبێ سەرنجدان بە تانە جۆراوجۆرەکانی ئەم دۆسیەیە، حوکمی سێدارەی پشتڕاست کردووەتەوە و جەختی کردەوە: ئەم جۆرە حوکمە ڕێک بە پێچەوانەی ڕەوتی دادوەری وڵاتە و دژایەتی هەیە دەگەڵ سیاسەتەکانی قەزایی لە هەمبەر سزای ستاندنی گیان.
ئەم پارێزەرە زیادی کردووە: بە هیچ کام لەو تانەگەلە کە لە پەیوەندی لەگەڵ دۆسیەی پەخشان عەزیزی هاتوونەتە گۆڕێ، لەلایەن دیوانی باڵای وڵاتەوە وڵام نەدراوەتەوە و هیچ گرنگایەتییەک بە ناوەڕۆکی دۆسییەکە نەکراوە.
ڕەئیسیان باسی لەوەش کردووە: سەرنجی ئەو بەڵگە و دێکیۆمێنتانە نەدراوە کە نیشان دەدات دۆسیەی پەخشان عەزیزی شایەنی حوکمی سێدارە نییە و سەرنجی چالاکیی ناوبراو لە باکووری سووریە و لە ئۆردووگای ئاوارەکانی شنگال و ئۆردوگاکانی دیکەی شەڕی داعش نەدراوە کە چالاکییەکی ئاشتیخوازانە بووە و لە بنەڕەتدا سیاسی نەبووە و لە ڕاستای یارمەتیگەیاندن بە قوربانییانی شەڕی داعش بووە.
پەخشان عەزیزی ڕێکەوتی ٢٤ی جۆزەردانی ١٤٠٣، بە تۆمەتی “بەغی” بە سێدارە حوکم درا. دواتر لە دۆسیەیەکی دیکەدا لە لقی سێی لێپێچینەوەی دادسەرای ئێڤین لەژێر ناوی “ئاژاوەنانەوە لە بەندیخانە”، بە ٦ مانگ بەندی تەعزیری حوکم درا.
ناوبراو ڕێکەوتی ١٣ی گەلاوێژی ١٤٠٢، لە تاران لەلایەن هێزەکانی وەزارەتی ئیتلاعاتی کۆماری ئیسلامیی ئێرانەوە دەسبەسەر کرا و ڕێکەوتی ٢٠ی خەزەڵوەری ١٤٠٢، لە بەندی ٢٠٩ی بەندیخانەی ئێڤین، ناسراو بە گرتنگەی ئیدارەی ئیتلاعات، بۆ بەندی ژنانی بەندیخانەی ئێڤین ڕاگوێزرا.
