لە هەفتەیەک کە لە ڕۆژژمێری فەرمیی کۆماری ئیسلامیی ئێران بە “هەفتەی وەحدەت” ناو نراوە، مامۆستا “ئایەت غوڵامی” وانەبێژ و پێشنوێژی پێشووی مزگەوتی محەممەد ڕەسوڵڵای کرماشان، لەلایەن لقی پێداچوونەوەی دادسەرای تایبەتی ڕووحانییەت، بە پێنج ساڵ بەندکرانی هەڵپەسێردراو و شەش مانگ بەندکرانی تەعزیری حوکم درا.
مامۆستا ئایەت غوڵامی پێشتر لەلایەن دادگای تایبەتی ڕووحانییەتی هەمەدان، بە تۆمەتەکانی “تەبلیغ دژی نیزام، بڵاوکردنەوەی چەواشەکاری، تێکدانی بیروڕای گشتی و بێڕێزیکردن بە حەزرەتی فاتمە”، بە دوو ساڵ بەندکرانی تەعزیری کە ساڵێکی دەبێ جێبەجێ بکرێت، حوکم درابوو کە داوای پێداچوونەوەی بۆ کرابوو. ئەم حوکمە ڕێکەوتی ٣ی جۆزەردان بەم مامۆستایە ڕاگەیەندرابوو کە ٢٠ ڕۆژ دەرفەتی ناڕەزایەتیی هەبوو..
مامۆستا ئایەت پێشتر و لە ڕێکەوتی ٣ی بانەمەڕ، بانگی دادگای تایبەتی ڕووحانییەتی کرماشان کرابوو و دەسبەسەر کرابوو. پاشان ڕێکەوتی ٦ی بانەمەڕ بە دانانی بارمتەی ٧٠٠ ملیۆن تمەنی بە شێوەی کاتی تا کۆتاییهاتنی قۆناغەکانی دادڕەسی، لە گرتنگە ئازاد کرا.
ئەم مامۆستا کوردە ڕێکەوتی ١٩ی پووشپەڕ، دوای بانگکردنی بۆ بەشی حەراسەتی ناوەندی ڕووحانییەتی کرماشان، بە فەرمانی ئەم ناوەندە ئەمنییە لە پێشنوێژیکردن و چالاکی لە مزگەوت دوور خرایەوە.
کەمێک پاش قەدەغەکردنی چالاکییەکانی، ناوبراو لە ڤیدیۆیەکدا سەرەڕای ناڕەزایەتیدەربڕین بەو حوکمە، جەختی کردەوە کە پێشتر هۆشداریی پێدراوە کە دەبێ هەموو پۆلەکان و دانیشتنەکانی مزگەوتی “محەممەد مستەفا” لەژێر چاوەدێری و بە وانەبێژیی وانەبێژانی خوازراوی ناوەندە ئەمنییەکان بەڕێوە بچێت.
مامۆستا ئایەت غوڵامی، هۆکاری قەدەغەکردنی چالاکییەکانی بۆ ناڕەزایەتی لەهەمبەر کوشتنی کۆڵبەران و سووتەمەنیبەران، ڕەخنەگرتن لە حکوومەت، واژۆکردنی بەیاننامەی ئیدانەکردنی لەسێدارەدانی مامۆستا محەممەد خزرنژاد، دەسبەسەرکردنی مامۆستایان و قەدەغەکردنی چالاکییەکانیان، گەڕاندووەتەوە.
