بەرەبەیانی ڕۆژی چوارشەممە، ١٥ی گەلاوێژی ١٤٠٤، سزای لەسێدارەدانی زیندانییەکی عەقیدەتیی خەڵکی جوانڕۆ بە ناوی “مەهدی ئەسغەرزادە”، کوڕی عەبدولکەریم، بە شێوەیەکی نهێنی لە زیندانی قزڵحساری کەرەج جێبەجێ کرا.
سەرچاوەیەکی ئاگادار لەم بارەیەوە وتی: “سزای لەسێدارەدانی ئەم زیندانییە بە نهێنی و بەبێ ئەنجامدانی دوایین دیدار لەگەڵ بنەماڵەکەیدا جێبەجێ کراوە”.
ئەم زیندانییە عەقیدەتییە، لە مانگی گەلاوێژی ساڵی ١٣٩٥دا دوای گەڕانەوەی لە سووریا، لە جوانڕۆ دەستبەسەر کرا و دوای دوو ساڵ زیندانی تاکەکەسی لە تاران، بۆ زیندانی دیزڵ ئاوای کرماشان گواسترایەوە و هەشت ساڵی ڕابردووی لەو زیندانەدا بەسەر بردبوو.
مەهدی ئەسغەرزادە پێشتر لە زیندانی دیزڵ ئاوای کرماشان بەهۆی ناڕەزایەتی دەربڕین بەرامبەر بە بارودۆخی خراپی زیندانیانی عەقیدەتی و دەمەقاڵێ لەگەڵ بەرپرسانی زیندان، ڕووبەڕووی لێدان و ئەشکەنجە ببووەوە و وەک ناڕەزایەتییەک دەستی دابووە مانگرتن لە خواردن.
مەهدی ئەسغەرزادە لە پاییزی ساڵی ١٤٠٢دا لەلایەن لقی دووەمی دادگای شۆڕشی کرماشانەوە بە سەرۆکایەتی دادوەر “شاهرۆخ مورادی” بە تۆمەتی “قیامی چەکدارانە دژی کۆماری ئیسلامی ئێران” سزای لەسێدارەدان و بە تۆمەتی “ئەندامبوون لە گرووپی تیرۆریستی داعش” سزای سێ ساڵ زیندانی بەسەردا سەپێنرابوو و ئەم حوکمە لە ڕێکەوتی ٢٥ی خەزەڵوەری ١٤٠٢دا پێی ڕاگەیەنرابوو.
