کاربەدەستێکی ئەمریکایی حکومەتی بریتانیا و وڵاتانی دیکەی ئورووپای وریا کردەوە کە کۆماری ئیسلامیی ئێران لە هەوڵی کردەوەی تێرۆریستی دایە لە خاکی ئەو وڵاتانەدا و پێویستە وڵاتانی ئورووپایی پێش لە کردەوە تێرۆریستییەکانی ئەو ڕێژیمە بگرن.
“نیتان سیلز”، ڕێکخەری بەرەنگاربوونەوەی تێرۆریزم لە وەزارەتی دەرەوەی ئەمریکا کە بۆ وتووێژ لەگەڵ کاربەدەستانی بریتانیایی سەردانی لەندەنی کردووە، لە وتووێژێکدا لەگەڵ ڕۆژنامەی ” دەیلی تێلیگراف” باسی لە هەوڵەکانی ڕێژیمی کۆماری ئیسلامیی ئێران کردووە بۆ ئەنجامدانی کردەوەی تێرۆریستی لە بریتانیا و وڵاتانی دیکەی ئورووپایی.
قسەکانی ناوبراو ڕۆژی شەممە ٢٥ی ڕەشەمەی ١٣٩٧ی هەتاویی کە لە ماڵپەڕی “دەیلی تێلیگراف”دا بڵاوبوونەوە، ئاماژەی بەوەدا کە ڕێژیمی کۆماری ئیسلامیی ئێران لە ساڵانی ڕابردوودا بە دوای چەند هەوڵێکی تێرۆریستیەوە بووە و و ئێستاش دەتوانێ ئەو کردەوە تێرۆریستیانە لە وڵاتانی ئورووپایی ئەنجام بدا. “سێلز” ئاماژەی بە دەرکردنی باڵوێزەکانی کۆماری ئیسلامی کرد لە سەرەتاکانی ساڵی ١٩٩٠ی زایینیدا.
شایانی باسە کە بە دوای بڕیاری دادگای میکونووس دا، لە پێوەندی لەگەڵ تێرۆری سکرتێری گشتیی حیزبی دێموکراتی کوردستان، دوکتۆر سادقی شەرەفکەندی و هاوڕێیانی دا، وڵاتانی ئورووپایی بۆ بۆ دژکردەوە بەو کردەوە تێرۆریستیەی ڕێژیمی کۆماری ئیسلامی ئێران باڵوێزەکانی خۆیان لە تاران بانگهێشت کردەوە و بریاری دادگای میکونووس و هەڵویستی وڵاتانی ئورووپایی ڕیسواییەکی گەورەی بۆ ڕێژیمی ئاخوندی بەدوای خۆیدا هێنا.
هەروەها لە چەند مانگی ڕابردوودا بەهۆی گەڵالەی بۆمب دانانەوە لە کۆبوونەوەی یەکێک لە ڕێکخراوە دژبەرەکانی کۆماری ئیسلامی لە فەڕانسە لە لایەن ڕێژیمی ئاخوندییەوە و هەوڵدان بۆ بۆ تێرۆری دژبەرانیان لە هولەند و دانمارک، پێوەندییەکانی ئورووپا و ئێران ساردی تێکەوت و ئەوەش بوو بە هۆی نیگەرانی وڵاتانی ئورووپایی.
