چاونیوز: دوای تێپەڕبوونی چەند ڕۆژێک بەسەر خۆپێشاندانەکانی شارەکانی ئێران و کوردستاندا، ڕۆژانە ناسنامەی چەندین قوربانی لە کوردستان ئاشکرا دەبێت.
بەپێی ڕاپۆرتە گەیشتووەکان بە ناوەندی مافی مرۆڤ بۆ ڕۆژهەڵاتی کوردستان، هاووڵاتییەک بە ناسنامەی “ئیسماعیل عەباسی پائیمامی”، خەڵکی پارێزگای کرماشان، کە ڕۆژی چوارشەممە، ١٧ی بەفرانباری ١٤٠٤، لە ڕەوتی ناڕەزایەتییە جەماوەرییەکانی دیزڵاوادا، بە تەقەی ڕاستەوخۆی گولـلەی جەنگی لەلایەن هێزەکانی کۆماری ئیسلامیی ئێرانەوە بە سەختی بریندار ببوو، دوای تێپەڕبوونی شەش ڕۆژ گیانی لەدەست دا.
بەپێی ڕاپۆرتەکان، ئەم هاووڵاتییە کوردە دوای گواستنەوەی بۆ نەخۆشخانە و تێپەڕبوونی شەش ڕۆژ، سەرەنجام بەهۆی سەختیی برینەکانیەوە گیانی لەدەست دا.
جێی ئاماژەیە، تەرمی “ئیسماعیل عەباسی پائیمامی”، ڕۆژی چوارشەممە، ٢٤ی بەفرانباری ١٤٠٤، لە گۆڕستانی گوندی “تەپە ئەفشار” بە خاک سپێردرا.
هەروەها، ئێوارەی پێنجشەممە، ١٨ی بەفرانباری ١٤٠٤، هاووڵاتییەکی دیکە بە ناسنامەی “ڕەزا حاجی مورادی”، خەڵکی شاباد، سەر بە پارێزگای کرماشان و دانیشتووی کەرەج، لە ڕەوتی ناڕەزایەتییە جەماوەرییەکانی فەردیسی کەرەجدا، بە تەقەی ڕاستەوخۆی هێزەکانی کۆماری ئیسلامیی ئێران گیانی لەدەست داوە.
بەپێی زانیارییەکان، تەرمی ئەم هاووڵاتییە دوای گوشارێکی زۆری ئەمنیەتی، ڕادەستی بنەماڵەکەی کراوەتەوە.
شایانی باسە، بڕیار بوو ڕێوڕەسمی بەخاکسپاردنی ڕەزا حاجی مورادی، ڕۆژی یەکشەممە ٢١ی بەفرانباری ١٤٠٤، لە قەسری شیرین بەڕێوە بچێت، بەڵام دوای بانگهێشتکردنی باوکی ناوبراو لەلایەن ئیدارەی ئیتلاعاتەوە، ڕێگری لە بەڕێوەچوونی ڕێوڕەسمەکە کرا و بنەماڵەکەی ناچار بوون تەرمی ڕۆڵەکەیان بە شێوەیەکی نهێنی و بەبێ بەڕێوەبردنی ڕێوڕەسمی گشتی بە خاک بسپێرن.
