۵ی جۆزەردانی ساڵی ۱۳۹۹ ھەتاوی
آموزش وردپرس

دەسبەسەرکردنی ۷۳۸ کەس لە کوردستان بە تۆمەتی ئەمنیەتی لە ساڵی ۲۰۱۹ی زایینیدا

ناوەندە ئەمنیەتییەکان لە ساڵی ۲۰۱۹ی زایینیدا لانیکەم ۷۳۸ کەسیان لە شار و ناوچە جۆراوجۆرەکانی کوردستان بە تۆمەتی ئەندامەتیی حیزبە سیاسییەکانی کوردستان و چالاکی ئەمنیەتی لەدژی بەرژەوەندییەکانی ڕێژیم دەسبەسەر کردوە

“چاونیوز”، ماڵپەڕی ناوەندی مافی مرۆڤی ڕۆژهەڵاتی کوردستان بڵاوی کردەوە کە لە وەرزی کۆتایی ساڵی ۲۰۱۹ی زایینیدا جیا لەو ۱۶۹ کەسەی لە ڕەشبگیرەکەی کۆتایی مانگی خەزەڵوەردا گیرابوون و ناوەکانیان بۆ ناوەندەکانی مافی مرۆڤ ئاشکرا ببوو،  ۲۰۴ کەس لە خەڵکی ئاسایی و چالاکانی مەدەنی و سیاسی لەلایەن دەزگا ئەمنیەتییەکانەوە بە تۆمەتی چالاکیی ئەمنیەتی و سیاسی لە دژی کۆماری ئیسلامی و بەرژەوەندییەکانی ئەو ڕێژیمە گیراون. ژمارەیەک لەوان دوای لێکۆڵینەوە و لێپێچینەوەکانی ناوەندە ئەمنیەتییەکان تا کاتی دادگایی‌کرانیان بە دانانی بارمتە ئازاد کراون و ۵۱ کەس لەوان دادگایی کراون و حوکمی ۴ مانگ تا ۱۱۸ ساڵ  زیندان و (سەرجەم ۳۷۶ ساڵ و ۶ مانگ، بە واتایەکی دی ۴۵۱۸ مانگ) زیندانییان بەسەردا سەپاوە.

هەروەها زیندانییەکی سیاسیی کورد بە تۆمەتی هەڵگەڕانەوە لە بڕیارەکانی ڕێبەری ئایینی ئێران سزای ئیعدامی بەسەردا سەپاوە و چالاکێکی سیاسیی کوردیش لەلایەن پۆلیسی تورکیەوە ڕادەستی ناوەندە ئەمنیەتییەکانی ئێران کراوەتەوە.

دەسبەسەرکردنی ۲۰۴ کەس و حوکمدرانی ۵۱ چالاکی سیاسی لە وەرزی کۆتایی ۲۰۱۹ لە حاڵێکدایە کە لە وەرزی یەکەمی ئەمساڵدا ۱۵۷ کەس، لە وەرزی دووهەمیدا ۱۸۴ چالاکی سیاسی و لە وەرزی سێهەمیشدا ۱۹۳ کەس بەتۆمەتی لایەنگری لە حیزبێکی کوردیی دژبەری کۆماری ئیسلامی گیرابوون و بەوەش ژمارەی ئەو کەسانەی لە ماوەی ساڵی ۲۰۱۹ی زایینیدا گیراون، گەیوەتە ۷۳۸ کەس.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

*

code