۴ی رەشەمەی ساڵی ۱۳۹۸ ھەتاوی
آموزش وردپرس

چەند کۆڵبەری دیکە لە خۆی، پیرانشار و چالدران درانە بەر دەستڕێژ

بەهۆی دەستڕێژی هێزە چەکدارەکانی کۆماری ئیسلامی چەند کۆڵبەری دیکە لە شارەکانی خۆی، چالدران و پیرانشار لە ڕۆژهەڵاتی کوردستان کوژران و بریندار بوون.

ڕۆژی یەکشەممە ٢٥ی خاکەلێوە هێزە چەکدارەکانی ڕێژیم لە ناوچە سنوورییەکانی شاری خۆی پۆلێک کۆڵبەریان دایە بەر دەستڕێژ. لەو پەلامارەدا یەک لەو کۆڵبەرانە بە ناوی بەهمەن رەوشەنی گیانی لە دەست دا. چەند ڕۆژ پێشتریش کۆڵبەرێکی دیکەی خەڵکی ئەم ناوچەیە بە ناوی بێهروز چەتۆرزادە بەهۆی دەستڕێژی هێزە چەکدارەکانی کۆماری ئیسلامی گیانی لێ ئەستێندرا.

ئومید خانی خەڵکی پیرانشار و مەجید جەلیلپوور خەڵکی ناوچەی چاڵدران دوو کاسبکاری دیکەی کوردن کە لەم حەوتوویەدا بە تەقەی هێزەکانی رێژیم بریندار بوون.

ڕۆژی پێنجشەممە، ۱۵ی خاکەلێوەش کۆڵبەرێکی خەڵکی گوندی گوزەڵەی بانە بە ناوی محەممەد کەوتبووە بەر دەستڕێژی هێزە چەکدارەکانی ڕێژیم و بە توندی بریندار ببوو. سێ ڕۆژ پێش ئەوەش کۆڵبەرێکی بەتەمەنی خەڵکی ناوچەی مەریوان بە ناوی کەریم ڕاستی دوای ڕاوەدوونانی هێزە چەکدارەکانی کۆماری ئیسلامی کەوتە سەر مین و بەو هۆیە بەتوندی بریندار بوو.

شایانی باسە بەردەوامیی کوژرانی کۆڵبەران و کاسبکارانی کورد لە دەسپێکی ساڵی نوێ لە حاڵێک دایە کە ە ماوەی ئەم ساڵەدا ۲۴۲ کۆڵبەر و کاسبکاری کورد بەهۆی تەقەی ڕاستەوخۆ، تەقینەوەی مین، بەربوونەوە لە بەرزایی لە سۆنگەی ڕاوەدوونان و هەروەها ڕەق‌هەڵاتن لە سەرما گیانیان لەدەست داوە و بریندار بوون. وردەکارییەکان دەریدەخەن کە لەو ۲۴۲ قوربانییەی ئەمساڵ ۸۰ کەسیان کوژراون و گیانیان لەدەست داوە، هەروەها ۱۶۲ کەسیش بریندار بوون.

 

 

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

*

code