چاونیوز: بە هۆی تەقەی ڕاستەوخۆی هێزە ئەمنییەتییەکانی کۆماری ئیسلامی لاوێکی سنەیی گیانی لە دەست دا.
بەپێی هەواڵی سەرچاوە باوەڕپێکراوەکان، شەوی یەکشەممە لەسەر دووشەممە، ٩ی خاکەلێوە، لاوێکی کوردی خەڵکی گەڕەکی کەمێزی شاری سنە، بە ناوی “محەممەد سوهرابزادە” بە تەقەی ڕاستەوخۆ و بێهۆی هێزە ئەمنییەتییەکانی کۆماری ئیسلامی گیانی لە دەست دا.
بەپێی وتەی شایەتحاڵان، ئەم هاووڵاتییە کوردە، لە کاتی گەڕانەوە لە گوندی قوڵیان بەرەو سنە، لە نێو ماشیندا لە حاڵێکدا لەگەڵ دایک و باوکی بووە، دەدرێتە بەر دەسڕێژ و گیانی لە دەست دەدات.
کوشتن و دەسبەسەرکردنی هاووڵاتییانی کوردستان و شارەکانی دیکە ئێران، لە حاڵێکدایە کە خەڵکی مەدەنی لەژێر هەڕەشە و مەترسیی شەڕی ئێران لەگەڵ ئامریکا و ئیسرائیلدان و سەدان کەسی بێتاوان و سڤیل لەم شەڕدا بەهۆی هەبوونی بنکە سەربازییەکانی کۆماری ئیسلامیی لە شوێنە مەدەنییەکاندا گیانیان لە دەست داوە.
