چاونیوز: دوای شەهید بوونی سێ تێکۆشەری خۆنەویستی ئەنجوومەنی ژینگەپارێزی “ژیوای” پاوە، ئەو ڕێکخراوەیە ڕاگەیاندنێک بڵاو دەکاتەوە کە دەقەکەی بەم شێوەیەی بەرەوەیە:
شەهید باڵای بە قەد باڵای کوردستانە”
باڵی ئازادی و بەیداخی لوتکەی هەڵوێستی ئینسانە”
خاکی پیرۆزی نیشتمان دوا ژوانی
شەهیدانە و ئەمڕۆ موختار و هاوڕێکانی چوونە ئامێزی دڵداری هەتاهەتایی خۆیان و هەر لەو جێژوانەدا بە بینینی فەرماندە شەریف و ئومێد شاد بوونەوە و پێیان وتن ئەوا بەڵێنمان بردە سەر و ڕێبازەکەتانمان گرتە بەر و پۆل پۆلیش لاوەکانی نیشتمانمان بەڕێیان کردین بۆ لاتان. لەوێدا شەریفی فەرماندە باوەش بۆ موختار دەگرێتەوە و دەڵێ بۆم بگێڕەوە چیرۆکی ئەو قارەمانیەتییە. ئیدی ئەوان دەکەونە گێڕانەوەی چیرۆکە جوانەکانی نیشتمان و شەریفی فەرماندە هاوار دەکات: شەهیدان وەرن! موختارمان لە لایە. شەهیدانی دیکەی نیشتمانیش لە دەوریان کۆ دەبنەوە و گوێ لە قسەکانی موختار دەگرن کە چۆن لاوەکانی نیشتمان خەریکی درێژەدان بە ڕێگای ئەوانن.
ڕەنگە بۆ ئەوانەی ڕێبازی پیرۆزی ژیوای و ژیوای دۆستان باش ناناسن وا دەر بکەوێت موختار و هاوڕێکانی ئیدی لە ناوماندا نیین، بەڵام بێگومان داربەڕووەکان و شاخ و داخ و ڕەوەز و پێدەشت و تەلان و هەواری هەورامان و کوردستان شایەتی لە سەر زیندووبوونی ئەو قارەمانانە دەدەن و یادی ئەو شەهیدانە، هاوڕێی هەموو ژیواییەکانە. لەمە بە دوا لە هەر کوێ کەڵێک و ئاسکێک و حاجی لەقلەقێک و کەوێ سەری قسە بکەنەوە، قسەکانیان بە ناوی ئەوانەوە دەس پێ دەکەن و یادی قارەمانیەتییەکانی ئەوان دەکەن بە وانەی ژیانی منداڵەکانیان.
ئەمڕۆ ژیوای هەر وەکوو کوردستان بە لەدەستدانی فەرماندە و ژینگەپارێزەکانی تووشی خەمێکی قورس و گران بووە و ڕەنگە دەرچوون لە ژێر ئەو خەمە بۆی سەخت و ئەستەم بێ، بەڵام بێگومان ژیوای و ژیواییەکان ئەم کۆستە دەکەن بە هەوێن و چرای ڕێگای داهاتوویان و بە هێزتر لە جاران پشت ڕاست دەکەنەوە و ناهێڵێن نیشتمان بێنازیی موختار و هاوڕێکانی پێوە دیار بێت.
دڵنیاین لە یادی ئەو سێ قارەمانەوە، خەڵف خەڵف لاوانی ژینگەدۆست چەکەرە دەکەن و قارمانانێکی نیشتمانپەروەر باڵا دەکەن کە هزری سەوزیان ڕێنیشاندەرە و تینوویەتیان بە گڕی دەشکێ.
ژیوای وێڕای سەرەخۆشی کردن لە خۆی و کوردستانیان و ژینگەدۆستانی جیهان و بنەماڵەی ئەو سێ شەهیدە بە تایبەت، لەگەڵ فەرماندە شەهیدەکانیشی پەیمان نوێ دەکاتەوە کە ڕێبازەکەیان دەبێت بە شاڕێگە. ژیوای بەڵێن بە شەهیدانی دەدات، ناهێڵێت ئاڵای نیشتماندۆستی بۆ چرکەیەکیش نەوی بێت.
ئەنجومەنی ژیوای پاوە
