بە پێی هەواڵی گەیشتوو بە چاونیوز، ڕۆژی پێنج شەممە ٤ی بەفرانباری ١٣٩٩، هێزێکی زۆری ئیتلاعاتی سپای پاسداران هێرش دەکەنە سەر ئاوایی کولیچ سەر بە شاری پیرانشار و هەڵدەکوتنەسەر ماڵی سێ هاونیشتمانی نیشتەجێی ئەو ئاواییە.
سەرچاوەیەک لە پیرانشار بە چاونیوزی ڕاگەیاند، هێزێکی چەند دە کەسی بە چەندین ماشێنەوە هێڕش دەکەنە سەر ئاوایی کولیچ و بەبێ هیچ بەڵگەیەکی قەزایی و یاسایی ماڵی سێ هاونیشتمانی ئامۆزا و برا بەناوەکانی کامیل ئەحمەد نژاد، قادر ئەحمەدنژاد و ئەبووبەکر ئەحمەدنژاد بە وردی دەپشکننەوە و دواتر کە هیچیان دەست ناکەوێت بێ ڕێزی بە بنەماڵەکانیان دەکەن و بە قسەی نەشیاو و هەڕەشە و گوڕەشە ئاوایی کولیچ بەجێ دێڵن.
سەرچاوەکە باسی لەوە کرد، هەتا ئێستا دیار نییە ئاخۆ ئەو هێزە بۆچی و بە چ هۆکارێک ئەو هێرشەی کردە سەر ئەو ماڵانە و مەبەستیان لە پشکنینی بێ بەڵگەی ئەو مالانە چ بووە؟!
