“عەبدوڵڵا ئاژیر” هاونیشتمانیی خەڵکی گوندی “سەروکانی” سەر بە پیرانشار، دوای ٤٠ ڕۆژ دەسبەسەربوون و ئازادیی کاتی بە دانانی بارمتە، تووشی نەخۆشییەکی دەگمەن و مەترسیدار بووە کە هەتا ئێستا پزیشکان بۆیان چارەسەر نەکراوە.
سەرچاوەیەکی ئاگادار و لە نزیکانی ئەم هاونیشتمانییە بە چاونیوزی گوت: عەبدوڵڵا ڕێکەوتی ٢٦ی خاکەلێوەی ئەمساڵ بەبێ حوکمی دادوەر لەلایەن هێزەکانی ئیدارەی ئیتلاعاتەوە دەسبەسەر و بۆ یەکێک لە گرتنگەکانی ئەم ناوەندە ئەمنییە لە ورمێ گوازرابووەوە. ناوبراو دوای نزیک بە ٤٠ ڕۆژ دەسبەسەربوون و لێپرسینەوە، بە دانانی بارمتەی دوو ملیارد تمەنی بە شێوەی کاتی ئازاد کرا.
ئەم سەرچاوەیە زیادیشی کرد: عەبدوڵڵا کە لاوێکی وەرزشکار و ئەندامی گرووپی شاخەوانیی پیرانشارە، چەند ڕۆژ دوای ئازادبوونی لەناکاو تووشی نەخۆشییەکی سەخت بووە و وێڕای ئەوەی چەندین جار سەردانی پزیشکی پسپۆڕی کردووە، بەڵام تا ئێستا چاک نەبووەتەوە و ئازار دەچێژێت.
ئەم سەرچاوەیە گوتیشی: سەرەتا زۆرینەی ئەندامانی لەشی عەبدوڵڵا لەکار کەوتن، بە جۆرێک کە لەدەست و لاق کەوتووە، ئێستا بەداخەوە تەنانەت بیناییشی لەدەست داوە و ناتوانێت قسەش بکات. دۆخی تەندرووستی ناوبراو بە جۆرێکە کە هەموو سیستەمی لەشی تێک چووە، تەنانەت پێکەنینەکانیشی لە حاڵەتی سروشتی دەرچووە و پزیشکانیش نەیانتوانیوە هۆکارەکانی دیاری بکەن یان کارێکی بۆ بکەن.
چالاکانی مافی مرۆڤی پیرانشار لەوە دەترسێن کە لە ڕەوتی لێپرسینەوە لەم هاونیشتمانییە، بە شێوەیەکی تایبەت ناوەندە ئەمنییەکان بۆ دانپێدانانی زۆرەملێ یان درووست کردنی ترس و دڵەڕاوکە لەنێو کۆمەڵگەدا، تووشی ئەم نەخۆشییەیان کردبێت.
ئەم هاونیشتمانییە ئێستا لە ماڵی باوکیدا لەژێر چاوەدێریدایە و دۆخی تەندروستی و دەروونیی زۆر ناجێگیرە.
