چاونیوز: دەزگای قەزاییی کۆماری ئیسلامیی ئێران، لە ماوەی مانگی ڕابردوودا، چەندین بەندکراوی سیاسیی کوردی بە تۆمەتی بێبنەما لە سێدارە داوە.
بەپێی هەواڵێک کە لە ماڵپەڕی هەواڵنێریی “میزان” سەر بە دەزگای قەزاییی کۆماری ئیسلامیی ئێران بڵاو بووەتەوە، بەرەبەیانی ڕۆژی دووشەممە، ١١ی جۆزەردان، دوو بەندکراوی سیاسیی کورد بە ناوەکانی “مێهرداد محەممەدینیا”، کوڕی موحەڕەم و “ئەشکانی مالکی” کوڕی عەلی، کە لە خۆپیشاندانەکانی بەفرانباری ساڵی ڕابردوو دەسبەسەر کرابوون، لە زیندانی قزڵحەساری کەرەج لە سێدارە دران.
دەزگای قەزاییی کۆماری ئیسلامی، ئەو دوو زیندانییە سیاسییەی کوردی بە تۆمەتی ئاگرتێبەردانی مزگەوتی جەعفەری لە گەڕەکی کۆی نەسر و بەریەککەوتن لەگەڵ هێزە نیزامییەکان تاوانبار کردبوو و وەک سەرکردەی ناڕەزایەتییەکانی بەفرانباری ١٤٠٤ ناوی بردوون.
ئەو تۆمەتانە لە کاتێکدا دەخرێنە پاڵ ناوبراوان کە لە ماوەی دادگاییکردنەکەیاندا لە مافی هەبوونی پارێزەر بێبەش بوون و ئەو تۆمەتانەی خراونەتە پاڵیان هیچ بنەمایەکی یاسایییان نییە؛ هەروەها دانپێدانانی ئەم کەسانە لەژێر ئەشکەنجەی جەستەیی و دەروونیدا بە زۆر لێیان وەرگیراوە.
ناوەندی مافی مرۆڤ بۆ ڕۆژهەڵاتی کوردستان، لەسێدارەدانی هاووڵاتییانی بێدیفاعی کورد بە کارێکی دژەمرۆیی دەزانێت و بە توندی مەحکوومی دەکات. ئەم ناوەندە داوا لە هەموو ناوەندەکانی مافی مرۆڤ لە کوردستان، ئێران و جیهان دەکات کە لە بەرامبەر لەسێدارەدان، کوشتار و ئازاردانی چالاکوانانی سیاسی و مەدەنی بێدەنگ نەبن و دەنگی بەندکراوانی بێدەرەتان و دیلی دامەزراوە ئەمنیی و قەزایییەکانی کۆماری ئیسلامی بن.
