چاونیوز: هێزە ئەمنییەتییەکانی کۆماری ئیسلامی، بە بیانووی بێبنەما چەندین هاووڵاتیی کوردستانیان دەسبەسەر کرد.
بەپێی هەواڵی گەیشتوو بە چاونیوز، کاتژمێری ٧ی سەرلەبەیانیی ڕۆژی شەممە، ٧ی خەرمانان، هێزە ئەمنییەتییەکان، هەڵیانکوتاوەتە سەر ماڵی چەندین هاووڵاتیی خەڵکی سەردۆش بە ناوەکانی “ئازاد نەوزەری، زانیار توانا، پوویا کاکەمحەممەدی،زانیار قادری و شێرزاد عەبدیـ”ـیان بە بیانووی کاسبیکردن لەسەر سنوور و بەزاندنی سنوور دەسبەسەر کردووە و ڕەوانەی بەندیخانەی مەریوان کراون.
بەپێی وتەی شایەتحاڵان، ئەم هاووڵاتییانە جگە لە کار و کاسبیی لە سەر سنوور هیچ کارێکی دیکەیان نەکردووە کە جێگەی گومان و لێپێچینەوە بێت.
هەتا کاتی بڵاوبوونەوەی ئەم هەواڵە هیچ زانیارییەک لەسەر بارودۆخی ئەم هاووڵاتییانە لە بەردەستدا نییە.
