چاونیوز: شەپۆلی لەسێدارەدانی بەندکراوانی سیاسیی کورد، لە چەند ڕۆژی ڕابردوودا دەستی پێ کردووەتەوە و بووەتە جێی نیگەرانی و مەترسیی بۆ خەڵکی کوردستان.
بەپێی هەواڵە بڵاوکراوەکان، بەرەبەیانیی ڕۆژی یەکشەممە، ١٣ی بانەمەڕ، مێحراب عەبدوڵڵازادە، ٢٧ ساڵە و خەڵکی ورمێ، لە بەندیخانەی ناوەندیی ورمێ لە سێدارە درا.
ئەم هاووڵاتییە، پێشتر لەلایەن لقی یەکی دادگای ئینقلابی شاری ورمێ، بە سەرۆکایەتیی قازی نەجەفزادە، بە تۆمەتی “دژایەتیی خودا”، “افساد فیالارض” و کوشتنی یەکێک لە هێزەکانی کۆماری ئیسلامی بە ناوی “عەباس فاتمیە”، لە کاتی ناڕەزایەتییەکانی “ژن ژیان ئازادی”، لە ڕەزبەری ١٤٠١ی هەتاوی، لە نووشین شاری ورمێ، بە ئێعدام مەحکووم کرا.
ئەگەرچی مێحراب عەبدوڵڵازادە، سەرجەمی ئەم تۆمەتانەی ڕەت کردەوە و دانپێدانانی بۆ ئەم تۆماتانەی بۆ ئەشکەنجە و ئازارەکانی لە کاتی لێپرسینەوە گەڕاندبووەوە، بەڵام حوکمەکەی لە لقی ٩ی دیوانی باڵای وڵات پشتڕاست کرابوو و دواتریش داوای پێداچوونەوە بە حوکمەکەی لەلایەن لقی ٣٩ی هەمان دیوانەوە ڕەت کرایەوە.
ناوبراو لە ڕۆژی سێشەممە، ٨ی بانەمەڕ، پاش تێکەڵچوونی لەگەڵ یەکێک لە مەئموورەکانی بەندیخانە بە هۆی بێڕێزیکردن بە بەندکراوانی سیاسی، بە فەرمانی پەیمان خانزادە، بەرپرسی زیندانی ورمێ، بۆ ژووری تاکەکەسی گوازرابووەوە.
شایانی باسە، سزای لەسێدارەدانی مێحراب عەبدوڵڵازادە، ڕۆژێک پاش لەسێدارەدانی دوو بەندکراوی سیاسیی دیکە بە ناوەکانی “ناسر بەکرزادە” و “یەعقووب کەریمپوور لە بەندیخانەی ورمێ جێبەجێ کرا.
ناوەندی مافی مرۆڤ بۆ ڕۆژهەڵاتی کوردستان، دەسپێکردنەوە شەپۆلی لەسێدارەدانی بەندکراوانی سیاسیی کورد، بە پێشێلکردنی مافە مرۆییەکانی و تۆڵەی سیاسیی لە کوردستان لە قەڵەم دەدات و داوا لە سەرجەم ڕێکخراوەکانی مافی مرۆڤی کوردستان و نێودەوڵەتی دەکات، بە نیسبەت پێشێلکاری و جینایەتەکانی کۆماری ئیسلامی بێدەنگ نەبن.
